DW xabariga koʻra, hujum 19-oktabr kuni, bogʻda bolali oilalar dam olayotgan paytda sodir boʻlgan. Xarkiv viloyati maʼmuriyati rahbari Oleg Sinegubov zarba Shahed turidagi dron bilan berilganini maʼlum qilgan.
Ukraina prezidenti Volodimir Zelenskiyning bildirishicha, dron oddiy kafe yaqinidagi bogʻga kelib urilgan.
Halok boʻlganlar orasida bir yoshdan endi oshgan Angelina ismli qiz ham bor. Zelenskiyning maʼlumotiga koʻra, u 2025-yil avgustda tugʻilgan. Qizning onasi Inna esa shifoxonada vafot etgan.
Hujumdan soʻng Zelenskiy hamkor davlatlarni Ukrainaning havo hujumidan mudofaa imkoniyatlarini kuchaytirishga chaqirgan. U tinch aholi hayotini himoya qilish uchun qoʻshimcha mudofaa vositalari zarurligini taʼkidlagan.
Shuningdek, Ukraina prezidenti AQSH va Yevropa mamlakatlarini Rossiyaga qarshi sanksiyalarni bekor qilmaslikka, Kiyevni qoʻllab-quvvatlashni davom ettirishga hamda Vashingtonning Moskvaga qarshi yangi sanksiyalarini kuchga kiritishga undagan.
«Biz tinchlik oʻrnatilishi va xavfsizlik kafolatlanishi uchun barcha imkoniyatlarni ishga solishni soʻraymiz. Ukraina tinchlikni xohlaydi», - degan Zelenskiy.
