Haydovçilarning sözlariga köra, tirbandlik uzunligi 25 kilometrga yetgan, çegarada kutiş vaqti esa uç sutkagaça çözilgan, deb xabar berdi Kazinform.
Davlat daromadlari qömitasi (DDQ) yuzaga kelgan vaziyatni yuk oqimining ortişi va elektron navbat tizimining işlaş xususiyatlari bilan boğlamoqda.
Uzoq masofaga qatnovçi haydovçilar nafaqat uzoq kutişdan, balki punktga olib boruvçi yöllarda hojatxonalar va oddiy maişiy şaroitlarning yöqligidan ham şikoyat qilmoqda. Şuningdek, baʼzilarning taʼkidlaşiça, ayrim yuk maşinalari umumiy navbatni çetlab ötmoqda.
DDQ maʼlumotlariga köra, 2026-yilning ön oyi davomida Qozoğiston va Özbekiston çegarasida avtomobillar oqimi 16,2 foizga oşib, 741,5 mingtaga yetgan. Uşbu davrda “B. Qonisbayev” punkti orqali 321 mingta avtomobil harakatlangan - bu ötgan yilga nisbatan 21 foizga köpdir. Hozir ötkaziş punktining loyihaviy quvvati sutkasiga 1 mingta avtomobilga möljallangan bölsa-da, amalda 1,5 mingtagaça maşinaga xizmat körsatilmoqda.
Idora maʼlum qilişiça, punkt odatdagi rejimda işlamoqda. U yerda furalarning töplanib qoliş sabablaridan biri sifatida CarGoRuqsat tizimi orqali ötiş navbatini keç band qiliş körsatilmoqda. Ayrim taşuvçilar çegaraga oldindan navbat olmasdan kelib, uni şu yerning özida rasmiylaştirayotgani sababli belgilangan vaqtni kutişga majbur bölişmoqda.
Şu bilan birga, 3-noyabr kuni ertalab tizimda “B. Qonisbayev” punkti orqali çegarani kesib ötiş uçun 130 ta böş örin (slot) mavjud edi. DDQ taʼkidlaşiça, ayrim haydovçilarning uzoq vaqt kutib qolişi barça taşuvçilar navbatda bir neça sutkalab turibdi, degani emas.
Punktdagi tirbandlikni kamaytiriş maqsadida rasmiylar transportning bir qismini “Atameken – Guliston” va boşqa ötkaziş punktlarga yönaltirişni rejalaştirmoqda.
