24-sentabr kuni Mangʻistau oblastida Qozogʻiston Harbiy-dengiz kuchlarining 19 nafar harbiy xizmatchisi Kaspiy dengiziga oqib ketdi, deb xabar berdi mamlakat mudofaa vazirligi.
Soʻnggi maʼlumotlarga koʻra, toʻqqiz nafar harbiyning oʻlimi tasdiqlangan. Yana uch kishi qutqarilgan, shundan bir nafari shifoxonaga yotqizilgan. Qolgan harbiylarni qidirish ishlari olib borilmoqda.
Harbiy idora hodisaga ob-havo keskin yomonlashishi va shamol kuchayishi sabab boʻlganini bildirdi.
Qidiruv-qutqaruv operatsiyasida Harbiy-dengiz kuchlari, Favqulodda vaziyatlar vazirligi, aviatsiya va boshqa xizmatlar ishtirok etmoqda. Mudofaa vaziri Dauren Kosanov boshchiligidagi Mudofaa vazirligi komissiyasi voqea joyiga yoʻl olgan.
Qozogʻiston Bosh prokuraturasi harbiy xizmatchilar oʻlimi yuzasidan jinoyat ishi qoʻzgʻatilgani, operativ-tergov guruhi tuzilganini maʼlum qildi.
Qozogʻiston harbiylarining Kaspiy dengizidagi «Xazar qoʻrgʻoni-2026» nomli harbiy-dengiz mashgʻulotlari 22-sentabr kuni boshlangandi. Unda Harbiy-dengiz kuchlarining 500 dan ortiq harbiy xizmatchilari, harbiy kemalar ekipajlari, qirgʻoq boʻlinmalari, shuningdek, Qirgʻoq qoʻriqlash va havo mudofaasi kuchlari ishtirok etmoqda.
