Bu prezidentning 27-avgustdagi PF–175-son farmonida belgilandi. Hujjat 28-avgustdan kuchga kirdi.

Farmonga muvofiq, «Ikkinchi imkon» iqtisodiy amnistiyasi 2026-yil 31-dekabrga qadar amal qiladi va kichik hamda oʻrta tadbirkorlik subyektlarini qamrab oladi.

Unga koʻra, iqtisodiy amnistiya eʼlon qilinguniga qadar yuzaga kelgan soliq qarzi, penyani hisobga olmagan holda, 2026-yil 31-dekabrga qadar toʻliq toʻlansa, ushbu qarzdorlik boʻyicha hisoblangan penya hisobdan chiqariladi. Shuningdek, qarz bilan bogʻliq ijro ishlari tugatiladi.

Mazkur tartibdan foydalanish uchun tadbirkorlik subyektida 2027-yil 1-yanvar holatiga penyadan tashqari soliq qarzi qolmagan boʻlishi kerak.

Shuningdek, tadbirkor avval taqdim etgan soliq hisobotlariga mustaqil ravishda tuzatish kiritib, qoʻshimcha hisoblangan soliq summasini 2026-yil oxirigacha toʻliq toʻlasa, ushbu summaga nisbatan penya hisoblanmaydi.

Iqtisodiy amnistiya doirasida xatolarini mustaqil bartaraf etgan tadbirkorlarning Tadbirkorlik subyektlarining barqarorlik reytingidagi ballari ham pasaytirilmaydi.

Bundan tashqari, 2026-yil 1-yanvarga qadar shakllangan ayrim qarzdorliklar hisobdan chiqariladi. Ular orasida soliq hisobotini oʻz vaqtida taqdim etmaganlik uchun qoʻllangan maʼmuriy jarimalarning toʻlanmagan qismi ham bor.