Viloyat XTB boshlig‘i Azizbek Mirkomilov esa tadbirlarda rasm va videotasvirlarni tarqatgan o‘qituvchilarni «gap tashish» va «g‘iybatchilik qilish»da aybladi.
Andijon viloyatidagi barcha tuman-shaharlardagi ta’lim muassasalarida o‘qituvchilar, maktab rahbarlari va mahalla ahli bilan «Gulxan atrofida» nomi ostida ommaviy tadbirlar o‘tkazilayotgani ijtimoiy tarmoqlar orqali keng muhokamalarga sabab bo‘ldi.
Ayrim o‘qituvchilar mazkur tadbirlarga majburlanayotgani, rahbarlar esa 22:00 gacha ta’lim muassasasida ushlab qolinayotgani haqida o‘z e’tirozlarini bildirishgan.
Biroq viloyat xalq ta’limi boshqarmasi mazkur iddaolarni keskin rad etib, tadbir mahallalar va u yerlarda yangi tashkil etilgan yoshlar yetakchilari tomonidan amalga oshirilayotganini ta’kidladi. Ammo viloyat ta’lim muassasalari xodimlarining Facebook’dagi sahifalarini kuzatar ekansiz, bu tadbirlarda asosan maktab o‘qituvchilari ishtirok etayotganini ko‘rish mumkin.
Shuningdek, mazkur tadbirlarda maktab o‘quvchilarning ham ishtiroki kuzatilmoqda.
Jumladan, Asaka tumani 30-umumta’lim maktabidagi kechki tadbirlarda yupun kiyingan o‘quvchilarning raqs tushayotgani internet sahifasiga joylashtirilgan.
Eng qizig‘i, mazkur tadbirlar ortidan ta’lim muassasalari rahbarlariga ommaviy tarzda «Vijdon xati» yozdirilmoqda.
Tahririyatimizga kelib tushgan mana shunday xatlardan birida direktor va uning o‘rinbosarlari tadbirlarda vijdonan ishtirok etishga va’da berishi haqida yozilgan.
Ushbu ijtimoiy tarmoqlarda muhokamalarga sabab bo‘layotgan holatlar ortidan viloyat XTB boshlig‘i Azizbek Mirkomilov murojaat bilan chiqdi va o‘z murojaatida guruhlardagi rasmlarni tarqatayotgan o‘qituvchilarni «gap tashish» va «g‘iybatchilik qilish»da aybladi.
