Toshkentning eski shahar hududi tarixiy ko‘rinishdagi turistik savdo zonasiga aylantiriladi

Turistik savdo zonasiga oid tafsilotlar hozircha ma'lum emas.

Prezident matbuot xizmati xabariga ko‘ra, davlat rahbari poytaxtda quriladigan muhtasham kutubxona va Milliy arxiv binosi bilan ham tanishgan.

«Milliy arxiv fondi o‘zining ko‘lami, hajmi, noyobligi jihatidan mintaqamizda yetakchilardan. Hozir bu yerda 1 million 800 ming saqlov birligidan ortiq turli davrga oid hujjatlar saqlanadi.

Qurilishi ko‘zda tutilgan yangi arxiv binosi zamonaviy arxitektura yechimlari va talablarni to‘liq o‘zida mujassam qiladi. Inshoot 1-toifadagi alohida muhim obektlarning talab va mezonlari asosida barpo etiladi. Eng avvalo, arxiv saqlovxonalari sig‘imini 3 million hujjatga mos holda oshirish, repozitoriy uchun joy tashkil etish, o‘quv zalini kengaytirish, tadqiqotchilarga xizmat ko‘rsatish sifatini yuqori darajada ta'minlash uchun zamonaviy axborot texnologiyalaridan keng foydalanishga sharoitlar yaratiladi.

Qolaversa, ushbu loyihalarda turizmni rivojlantirish maqsadida xorijiy fuqarolarni jalb qilgan holda arxiv ko‘rgazmalarini tashkil etish imkoniyatlari ham ko‘zda tutilgan.

Taqdim etilgan loyihada ulkan o‘quv zali majmuasi, anjumanlar va ko‘rgazmalar uchun zallar, ilmiy ma'lumotlar kutubxonasi hamda muzey, kinozal, bufet va muzokaralar uchun xonalar inobatga olingan.

Prezidentimiz mazkur loyihalarni yanada takomillashtirish, aholimiz uchun keng qulayliklar yaratish yuzasidan o‘z tavsiyalarini berdi.

Shuningdek, fuqarolarning o‘zini o‘zi boshqarish organi komplekslarining namunaviy loyihalari taqdimot qilindi.

Ma'lumki, davlatimiz rahbarining 2020 yil 18 fevraldagi «O‘zbekiston Respublikasi Mahalla va oilani qo‘llab-quvvatlash vazirligi faoliyatini tashkil etish to‘g‘risida»gi qarorida Mahalla markazi majmualarini qurish ko‘rsatib o‘tilgan. Shundan kelib chiqib, loyihalarda innovatsion texnologiyalardan, arzon, energiya tejamkor materiallardan foydalanish nazarda tutilgan. Ularni davlat-xususiy sheriklikning shartlari asosida puxta, sifatli va namunaviy loyihalar asosida qurish belgilangan.

Prezidentimiz Shavkat Mirziyoyev hududlarda barpo etiladigan ushbu komplekslarning namunaviy loyihalari bilan yaqindan tanishib o‘z ko‘rsatmalarini berdi», – deyiladi prezident matbuot xizmati xabarida.