O‘zbek palovi YuNeSKO nomoddiy madaniy merosi ro‘yxatiga kiritildi

Nomoddiy madaniy meros bo‘yicha Hukumatlararo Qo‘mita 1 dekabrda palov bilan bog‘liq an'analarni YuNeSKO nomoddiy madaniy merosi ro‘yxatiga kiritdi. 

Qo‘mitaning navbatdagi yig‘ilishi Addis-Abebada (Efiopiyada) 28 noyabrdan 2 dekabrga qadar bo‘lib o‘tmoqda.  Yig‘ilish davomida palov bilan bog‘liq an'analarni YuNeSKO nomoddiy madaniy merosi ro‘yxatiga kiritish haqida qaror qabul qilindi. 

Palov - o‘zbek oshxonasining eng katta yutuqlaridan biri va aholining sevimli taomi. O‘zbek oshxonasining ko‘p asrlik rivoji davomida palov tayyorlashning o‘nlab usullari paydo bo‘ldi. 

Har bir mintaqa o‘ziga xos palov tayyorlash usuliga ega. O‘zbekistondagi oilalarning aksariyatida nafaqat o‘zbek millati vakillari, balki shu yerda yashovchi boshqa millat vakillari ham hech bo‘lmaganda haftada bir marta (ko‘pincha payshanba kuni) palov tayyorlashadi. Bu o‘ziga xos an'anaga aylangan.