O‘zbekiston Afg‘onistonga beg‘araz yordam tariqasida 26 tonnadan ziyod urug‘ yetkazib berdi

O‘zbekiston prezidentining qo‘shni mamlakatlar bilan do‘stona munosabatlarni mustahkamlash borasidagi siyosati asosida Afg‘onistonga beg‘araz ravishda qishloq xo‘jaligi mahsulotlari yetkazib berildi. Bu haqda Qishloq xo‘jaligi vazirligi xabar berdi.

Qayd etilishicha, Afg‘oniston Qishloq xo‘jaligi, irrigatsiya va chorvachilik vaziri boshchiligidagi rasmiy delegatsiya O‘zbekistonga tashrif buyurgan. Mehmonlar Toshkent va Samarqand viloyatlaridagi agrar korxonalar, agroklasterlar va ilmiy-tadqiqot markazlari faoliyati bilan yaqindan tanishgan.

Hamkorlik aloqalarini yanada mustahkamlash maqsadida O‘zbekiston Qishloq xo‘jaligi vazirligi tomonidan Afg‘oniston fermerlari va agrar tuzilmalariga beg‘araz yordam tariqasida qishloq xo‘jaligi mahsulotlari yetkazib berilgan. Jumladan, ob-havo sharoitlariga chidamli, sertifikatlangan 5 tonna chigit (200 gektar yer maydoni uchun), 20 tonna sholi (100 gektar maydon uchun), 500 kilogramm mosh (25 gektar uchun), shuningdek, 187 kilogramm sabzavot urug‘lari va 600 kilogramm poliz ekinlarining saralangan, yuqori sifatli urug‘lari topshirilgan.

«Mazkur amaliy yordam Afg‘onistonda oziq-ovqat xavfsizligini ta’minlash, qishloq aholisi bandligini oshirish hamda agrar sohada innovatsiyalarni joriy etishga xizmat qilishi kutilmoqda», — deyiladi xabarda.

Eslatib o‘tamiz, mart oyida O‘zbekiston Afg‘onistonga qariyb 200 tonna insonparvarlik yordami yuborgandi. O‘shanda insonparvarlik yordami tarkibidan un, makaron mahsulotlari, o‘simlik yog‘i, shakar va boshqa oziq-ovqat mahsulotlari o‘rin olgan edi.