«Uztrade Mazari-Sharif Trading House» savdo uyi qoshida doimiy faoliyat yurituvchi «shou-rum» tashkil etilgan bo‘lib, unda o‘zbek ishlab chiqaruvchilarining keng namunadagi mahsulotlari namoyish qilinadi. Umuman «Uztrade» kompaniyasining 2017 yilda Afg‘onistonga umumiy eksporti 23,4 mln AQSh dollarini tashkil etdi. «Uztrade» AJ boshqaruvi raisi Sharof Rahmonov Xalqaro Simpoziumlar saroyida bo‘lib o‘tgan anjumanda shu haqda ma'lum qildi.
Uning so‘zlariga ko‘ra, O‘zbekistonning 9 viloyatidan 26ta korxona eksport faoliyatiga jalb etilgan. 20 turdagi yangi mahsulotni eksport qilish o‘zlashtirilgan bo‘lsa, jami esport qilinadigan mahsulotlar soni 200dan ortadi. Afg‘oniston prezidentining O‘zbekistonga davlat tashrifi doirasida «Uztrade» kompaniyasi afg‘on hamkorlar bilan 2018-2019 yillarga mo‘ljallangan 64,8 mln dollarlik eksport shartnomalarini imzoladi.
Mazkur savdo bitimi ijrosiga O‘zbekistonning 12 hududidan 50ta yangi korxona jalb etiladi. Yangi turdagi 40ta mahsulot eksportini o‘zlashtirish rejalashtirilmoqda. Jami mahsulotlar turi esa, 300dan oshishi kutilmoqda.
Bundan tashqari, savdo uyining Kobul, Qunduz, Hirot, Qandahor, Shibirg‘on va boshqa shaharlarida 8ta yangi bo‘limini ochish rejalashtirilgan. Farmatsevtika sanoati, mashinasozlik va mebel ishlab chiqaruvchi korxonalar ham eksport faoliyatiga jalb etilgan.
