Robaxon Mahmudova «Adolat» partiyasi raisi etib saylandi

Plenumda partiyaning 2023 yilgi faoliyati yakunlari hamda 2024 yilgi faoliyat yo‘nalishlari muhokama qilindi. 

Shuningdek, plenumda tashkiliy masala ko‘rib chiqildi. O‘zbekiston «Adolat» sotsial-demokratik partiyasi siyosiy kengashi raisi Bahrom Abduhalimov o‘z arizasiga muvofiq, siyosiy kengash a’zolarining ochiq ovoz berish yo‘li bilan partiya siyosiy kengashi raisi lavozimidan ozod etildi.

Partiya raisligiga Robaxon Mahmudova nomzodi ko‘rib chiqilib, siyosiy kengash a’zolari tomonidan ochiq ovoz berish yo‘li bilan saylandi.

Robaxon Mahmudova 1958 yilda Farg‘ona shahrida tug‘ilgan, 1983 yilda Toshkent davlat universitetining «Huquqshunoslik» fakultetini tamomlagan. Muqaddam Jinoyat ishlari bo‘yicha Farg‘ona viloyati sudi raisi lavozimida ishlagan, 2017-2020 yillarda O‘zbekiston prezidentining Farg‘ona viloyatidagi Xalq qabulxonasi mudiri bo‘lgan.

2020 yil yanvarida Farg‘ona viloyatidan senator etib saylangan, keyinroq Senatning Fan, ta’lim, sog‘liqni saqlash masalalari qo‘mitasi raisi lavozimiga saylangandi.

U 2020 yil iyul oyidan buyon O‘zbekiston Oliy sudi raisining birinchi o‘rinbosari – Ma’muriy ishlar bo‘yicha sudlov hay’ati raisi lavozimida ishlab kelayotgandi.

Robaxon Mahmudova 2023 yil iyun oyida o‘tkazilgan navbatdan tashqari prezidentlik saylovida nomzod sifatida ishtirok etgandi.