Qoʻshimcha funksionallar
-
Tungi ko‘rinish
Diniy sohada tayinlovlar: Xalqaro islom akademiyasidan so‘ng Oliy ma’hadda ham rektor almashdi
Prezidentning din va millatlararo munosabatlar masalalari bo‘yicha maslahatchisi lavozimidan ozod etilgan Muzaffar Komilov Xalqaro islom akademiyasiga rektor bo‘ldi. Xalqaro Islom akademiyasining sobiq rektori Uyg‘un G‘afurov esa Toshkent islom institutiga o‘tdi. Toshkent islom instituti rektori lavozimida ishlab kelgan Muhammadolim Muhammadsiddiqov muftiyga o‘rinbosar bo‘ldi.
Foto: Musulmonlar idorasi matbuot xizmati
6 dekabr kuni bo‘lib o‘tgan Imom Buxoriy nomidagi Toshkent islom instituti pedagoglar jamoasining kengaytirilgan yig‘ilishida tashkiliy masala ko‘rildi. Bu haqda Musulmonlar idorasi matbuot xizmati xabar berdi.
Majlisda tarix fanlari bo‘yicha falsafa doktori Uyg‘un G‘afurov Imom Buxoriy nomidagi Toshkent islom instituti rektori lavozimiga tayinlangani e’lon qilindi. U 5 dekabr kuni xalqaro islom akademiyasi rektori lavozimidan ozod etilgan edi.
Uyg‘un G‘afurov bunga qadar ham Toshkent islom instituti rektori lavozimida 8 yil (2015-2023 yillarda) ishlagan.
Ayni vaqtda institut rektori vazifasida ishlagan professor Muhammadolim Muhammadsiddiqov O‘zbekiston musulmonlari idorasi raisining Yoshlar ishlari bo‘yicha o‘rinbosari lavozimidagi faoliyatini davom ettiradi.
Eslatib o‘tamiz, Shavkat Mirziyoyevning tegishli farmoni bilan 4 dekabr kuni Muzaffar Komilov O‘zbekiston prezidentining din va millatlararo munosabatlar masalalari bo‘yicha maslahatchisi lavozimidan ozod etilgan edi.
Komilov 5 dekabr kuni Vazirlar Mahkamasining tegishli qarori bilan O‘zbekiston xalqaro islom akademiyasi rektori lavozimiga tayinlangan. Shu munosabat bilan Uyg‘un G‘afurov O‘zbekiston xalqaro islom akademiyasi rektori lavozimidan ozod etilgan edi.
