O‘zbekistonda avtobuslarni xarid qilishda ularning yo‘lovchi sig‘imi hisobga olinadi

Prezident Shavkat Mirziyoyev 29 yanvar kuni o‘tkazgan videoselektor yig‘ilishida jamoat transportini rivojlantirish borasidagi ishlarni yanada jadallashtirish bo‘yicha topshiriq berdi.

«Tahlillarga ko‘ra, tirbandliklar ham havoning tozaligiga salbiy ta’sir ko‘rsatayapti. 

Chunki, harakatdagi avtomobilga qaraganda tirbandlikda turganlari havoni ko‘proq ifloslantiradi. 

Shu sababli, jamoat transportini rivojlantirish borasidagi ishlar yanada jadallashtiriladi», deyiladi prezident matbuot xizmati xabarida.

Endilikda avtobuslar xarid qilishda ularning yo‘lovchi sig‘imiga ko‘proq e’tibor qaratish kerakligi ta’kidlandi. 

Shuningdek, metro vagonlari sonini oshirish bo‘yicha amaliy choralarni ham tezlashtirish lozimligi ko‘rsatib o‘tilgan.

Bundan tashqari, «yashil energetika»ni qo‘llab-quvvatlash, ekologik muammolarning oldini olish va zararli oqibatlarni kamaytirish maqsadida aholini elektromobillarga o‘tishini rag‘batlantirish tizimi joriy qilinadi.

Ma’lumot uchun, 2023 yil aprelida Rossiyaning «Metrovagonmash» kompaniyasi yil oxiriga qadar Toshkent metropoliteni uchun yana 56 ta vagon (14 ta tarkib) yetkazib berishi kutilayotgani haqida xabar berilgandi. Kompaniya bunga qadar 2019−2021 yillarda jami 60 ta vagon yetkazib bergan.

2023 yil oktyabrida Toshkent metropoliteni 2024 yilda qo‘shimcha 104 vagon qabul qilib olinishi rejalashtirilganini ma’lum qilgandi.

• Bugungi yig‘ilishda prezident bosh vazir o‘rinbosari Ochilboy Ramatov va boshqa mas’ul rahbarlarga Toshkent shahridagi tirbandliklar muammosini hal etish bo‘yicha takliflar tayyorlashni topshirdi. «Shaharsozlik va yo‘l harakatiga mas’ul barcha bo‘g‘indagi rahbarlar „Shahar — piyodalar uchun“ degan shiorni o‘zining asosiy tamoyili qilib olishi shart. Bunda, jamoat transportiga har tomonlama ustunlik berilishi, avtomobillar esa hashamatga aylanishi kerak», — dedi Shavkat Mirziyoyev.
• Shuningdek, prezident bosh vazir Abdulla Aripovga O‘zbekistonda 2025 yildan Ai-80 benzinidan voz kechish masalasini uzil-kesil hal qilishni topshirdi. Bundan tashqari, og‘ir yuk mashinalari, 10 yildan oshgan avtomobillar hamda Yevro-4 standartidan past yonilg‘ini ishlatishning atrof-muhitga zararini kamaytirish mexanizmlari ishlab chiqiladi.