Toshkent metropolitenida bir kunda tashilgan yoʻlovchilar soni boʻyicha navbatdagi rekord qayd etildi.
21-sentabr kuni metro xizmatlaridan jami 1 181 581 nafar yoʻlovchi foydalandi.
Bundan avvalgi eng yuqori natija 2026-yil 14-sentabr kuni qayd etilgan edi. Oʻsha kuni Toshkent metrosi 1 165 550 nafar yoʻlovchiga xizmat koʻrsatgan.
Yangi koʻrsatkich avvalgi rekorddan 16 031 nafarga koʻp boʻldi.
Metropoliten mutaxassislari olib borayotgan monitoring va tahlillar yoʻlovchilar oqimining oʻsish tendensiyasi davom etayotganini koʻrsatmoqda.
Mavjud koʻrsatkichlar asosida oktabr oyida metroning bir kunlik yoʻlovchilari soni 1,2 million nafarga yetishi kutilmoqda.
Shu munosabat bilan Toshkent metropoliteni 1 200 000-yoʻlovchini alohida aniqlab, unga maxsus imtiyoz yoki sovgʻa taqdim etishni rejalashtirgan.
Mazkur tashabbus yoʻlovchilarni ragʻbatlantiruvchi va ramziy tadbir sifatida tashkil etilishi koʻzda tutilgan.
Shuningdek, 2026-yilda xarid qilinishi rejalashtirilgan 14 ta zamonaviy poyezd tarkibining barchasi Toshkent metropoliteniga yetkazib berilgan.
Yangi poyezdlar yoʻlovchilarga qulay va tezkor xizmat koʻrsatish hamda harakatni oʻsib borayotgan yoʻlovchilar oqimiga moslashtirishda foydalanilmoqda.
