“Uyushgan jinoyatchilik biznes niqobi ostida daromadli sohalarga kirib boryapti” – Shavkat Mirziyoyev 

Shavkat Mirziyoyev O‘zbekistonda uyushgan jinoyatchilik biznes niqobi ostida daromadli sohalarga kirib borayotganini tanqid qildi.

“Ilgari faqat “ko‘cha” deb bilgan uyushgan jinoyatchilik bugun biznes niqobi ostida ancha daromadli sohalarga kirib boryapti. Ayniqsa, jinoiy to‘dalar faoliyati ko‘p qavatli uylar, avtomashinalar oldi-sotdisi, moliyaviy piramidalar tashkil qilish, Umra va Haj ziyoratiga yuborishda ancha ko‘paygan.

Shaharda kvartira sotish masalasida 3 000 dan ziyod fuqaroga 1,3 trln so‘m zarar yetkazilgan. Misol uchun, “Credit House”, “Infin Story Invest” qurilish korxonalari kvartira sotish vaji bilan 2000 nafar fuqaroni aldab, 490 mlrd so‘m pullarini o‘zlashtirgan.

Yoki “Umid Avtolizing”, “Halol Avtolizing” kompaniyasi kabi firmalar jami 1800 nafar fuqaroga avtomashina yetkazib berishni va’da qilib, ularning 80 mlrd so‘mini qo‘lga kiritgan. O‘zbekistonda bo‘lyapti bu gaplar. Shuningdek, “Jalolquduq Aviatrans” korxonasi Umra ziyorati bo‘yicha 534 nafar fuqaroni aldab, shunchaki Saudiya Arabistoniga yuborish bilan cheklangan, yetkazilgan zarar 18 mlrd so‘m bo‘lgan. Bu ham haqiqat, bu ham O‘zbekistonda bo‘lyapti. Lekin hech kim bong urmaydi. Jahongir Xatamov (Bosh prokuratura xuzuridagi Departament rahbari – tahr.) tashkiloti bunday uyushgan jinoiy guruhlar faoliyatiga qachon barham beradi? Sizlar qilmasangiz kim qiladi, Xatamov?” dedi Shavkat Mirziyoyev.

Shuningdek, prezident O‘zbekiston fuqarolari chet davlatlarda ham uyushgan guruhlar tuzib, tovlamachilik va zo‘ravonlik bilan shug‘ullanayotganini ta’kidladi.

“Eng yomoni, chet davlatlarda ham o‘zimizning fuqarolar uyushgan guruhlar tuzib, bizdan borganlarga nisbatan tovlamachilik, zo‘ravonlik bilan shug‘ullanyapti. O‘zbeklarning chet eldagi ommaviy mushtlashuvlari yurtimiz obro‘siga juda katta putur yetkazyapti. Ijtimoiy tarmoqlarda chiqib yotibdi har kuni. Dunyo hamjamiyati bilan hamkorlikda ishlash uchun juda katta putur bu. O‘tgan yilning o‘zida chet elda og‘ir ahvolga tushgan 3700 nafar fuqaromiz mamlakatimizga qaytarildi. Yoki 192 nafar fuqaromiz odam savdosi qurboniga aylandi. Toshpo‘latov (IIV – tahr.), Qurbonov (DXX- tahr.), Rahmatullayev, chet elda uyushgan jinoiy guruhlar tashkil qilgan, u yerda o‘zimizning fuqarolarni ham talayotgan shaxslar faoliyatiga qachon chek qo‘yiladi?”, dedi davlat rahbari.

Eslatib o‘tamiz, oson shartlarda mashina olib berish va’dasi bilan ko‘plab odamlarni chuv tushirgan “Halol Avtolizing” ishida Kun.uz surishtiruvidan so‘ng tergov boshlangan hamda jinoyat ishi ochilgandi.