“Ўзатом” агентлиги ва “Росатом” давлат корпорацияси Ўзбекистонда катта қувватли атом электр станциясини қуриш бўйича битим имзолади.
Бу ҳақда хабар берган “Росатом” баёнотида ҳужжат аввалига “Ўзбекистон Республикасида катта қувватли АЭС қуриш лойиҳасини амалга оширишнинг асосий шартлари тўғрисида” деб аталган эди.
Кейинроқ пресс-релиз таҳрирланиб, имзоланган ҳужжатнинг номи “Ўзбекистон Республикасида катта қувватли АЭС қуриш лойиҳасини амалга ошириш имкониятларини ўрганиш тўғрисида” деб ўзгартирилди.
“Ўзбекистонда кичик модулли электр станцияси замонавий кичик атом электр станциясининг сайёрадаги биринчи экспорт маҳсулотидир. Ҳозир лойиҳани кенгайтириш ва ушбу гигаваттли майдонда яна иккита йирик энергия блокини қуриш устида ишлаяпмиз”, деди “Росатом” бош директори Алексей Лихачев.
Россия ҳукумати раиси ўринбосари Александр Новакка кўра, Россия Ўзбекистонда 2 GW қувватли катта АЭС ва 110 MW қувватли кичик АЭС қуришни режалаштиряпти.
“Бугун АЭС қурилишининг аниқ иқтисодий параметрлари муҳокама қилинмоқда. Бу 1000 MW қувватга эга иккита катта энергоблок ва 55 MW қувватга эга иккита кичик блок бўлади. Биринчи марта Ўзбекистонда кичик қувватли атом станциясини қуришни амалга оширамиз”, – деди Новак Санкт-Петербург халқаро иқтисодий форумида.
“Росатом” ўз баёнотини юқорида келтирилган тарзда таҳрирлагани – “Ўзатом” томонидан ҳам пресс-релиз эълон қилиниши фонида рўй берди.
Ўзбекистон томонининг ахборотида бу битим “катта қувватли АЭС қуриш лойиҳасини амалга ошириш имкониятларини ўрганиш тўғрисида” деб номланган.
“Ҳужжат иккита ВВЭР-1000 қурилишини келгусида тўртта энергоблоккача кенгайтириш билан амалга ошириш мумкин бўлган асосий шартларни ўз ичига олади”, дейилади “Ўзатом” пресс-релизида.
Эслатиб ўтамиз, Ўзбекистон ва Россия АЭС қуриш бўйича 2018 йилда шартнома тузган, ўшанда 1,2 GW қувватга эга иккита энергоблок режа қилинганди. Кейинчалик шартномага ўзгариш киритилди ва Жиззахда кам қувватли (330 MW) АЭС қуришга қарор қилинди.
