Оксфорд университетининг энергетика сиёсати ва иқлим бўйича профессори Ян Розенов BBC’га қуёш энергетикаси энергетик ўтишнинг ҳаракатлантирувчи кучига айланганини айтган.
Нашр маълумотига кўра, сўнгги 26 йилда дунё атом электр станцияларида ишлаб чиқариладиган электр энергияси ҳажми умумий ҳисобда деярли ўзгармаган. Қуёшдан электр олиш эса шу даврда тахминан 2700 баравар кўпайган.
Бу ўсишда Хитойнинг ўрни катта. Мамлакатдаги улкан ишлаб чиқариш қувватлари фотоэлектрик тизимлар нархининг кескин пасайишига олиб келган.
АҚШда эса атом энергетикасини ривожлантиришга умид боғлаган кўплаб стартаплар пайдо бўлган. Бироқ улар таклиф қилаётган янги ядровий технологияларни тижорий фойдаланишга олиб чиқиш жараёни секин кечмоқда.
Шу билан бирга, сўнгги ўн йилликларда АҚШда атом электр станцияларини қуриш қиймати сезиларли ошган. Қуёш энергетикасида эса ускуналар арзонлашиши унинг кенгроқ тарқалишига шароит яратмоқда.
Хабарда АҚШнинг Эронга қарши уруши фонида нефт таъминотидаги узилишлар муқобил энергия манбаларига қизиқишни кучайтиргани ҳам қайд этилган. Кўплаб мамлакатлар учун арзонлашаётган қуёш энергияси энергия таъминотини диверсификация қилишнинг муҳим воситасига айланмоқда.
