Роналду ўрнига Рамуш гол урмоқда, Ирландия-Исроил ўйинида яна можаро
|12:22 / 05.10.202619 56911 мин
Жаҳон чемпионатида шов-шув кўтарган Норвегия кетма-кет уч бор ютқазиб, сўнгги ўринга тушиб кетди, Эрлинг Ҳоланд Португалияга қарши ўйинни якунлай олмади; стартдаги тўрт ўйинда фақат бир ғалабага эришган Клопп Германияси ҳам гуруҳда қолиб кетиши мумкин.
Португалия иккинчи ўзаро ўйинда ҳам Норвегиядан устун келди – 2:1. Скандинавлар устози Столе Солбаккен олдинги ўйинларда қўпол хатоларга йўл қўйгани учун дарвозабон Нюландни алмаштирганди, аммо бу ҳам фойда бермади. Ҳолбуки Норвегия Мартин Эдегорнинг узатмаси ва Айер тўп учун курашда ютиб чиқиб, фантастик зарбаси йўллаши орқали ҳисобда олдинга чиқиб олишганди, аммо португаллар камбэк амалга оширишди. Ҳисоб очилганидан икки дақиқа ўтиб Жорже Жезуш шогирдлари аут ижроси орқали рақибни ҳайрон қолдиришди: Мендеш тўпни жарима майдони ичкарисига эмас, ташқарида турган Жоау Канселуга оширди, у эса тўпни дарвоза тўққизлигига аниқ йўналтирди.
Норвегияликларда иккинчи бўлимда ҳисобда олдинга чиқиб олиш учун яхши имконият юзага келганди, аммо Эрлинг Ҳоланд Рубен Диаш билан тўп учун курашда ютиб чиққанидан кейин йўллаган зарба дарвоза соҳасига тўғри бормади. У иккинчи бўлим давомида танасида ноқулайлик ҳис қилди ва ўзини алмаштиришни сўради.
Португалия эса ўз имкониятидан фойдаланди: 79-дақиқада Витиня тўпни жарима майдонида ўзини таклиф қилган Жоау Фелишга етказиб берди, у эса тўпни бир тегинишда қулайроқ вазиятда турган Гонсалу Рамушга етказди ва Роналду ўрнига асосий форвардга айланган футболчи ҳужумни аъло даражада якунлади. Статистикага кўра, ушбу футболчи гол урган ўйинларда Португалия ғалаба қозониши кафолатланган (11 тадан 11 та).
Ўйин охирида ҳакам икки дарвозага ҳам биттадан пеналти белгиламади, Франсишку Консейсау эса ҳакам билан тортишгани учун бир дақиқа ичида икки бор сариқ карточка олиб майдонни тарк этди. Лекин Норвегия қолган дақиқаларда сон жиҳатдан устунликдан фойдалана олмади ва гуруҳда сўнгги ўринга тушиб кетди. Португалия Жорже Жезуш бошқарувидаги тўртинчи ўйинда ҳам ғалаба қозонди, шундан учтасида Криштиану Роналдунинг хизматларига эҳтиёж сезилмади.
Параллел ўйинда эса уэлсликлар дарвозабони Уорд қаҳрамондан антиқаҳрамонгача бўлган йўлни босиб ўтди. Биринчи бўлим бошидаёқ жароҳат туфайли жамоа сардори Ҳейбергсиз қолганига қарамай, данияликлар фаолроқ бўлишди ва кетма-кет вазиятлар яратишди. Уорд ўйин давомида девордек турди, иккинчи бўлим давомида Ҳойлунд ва Исаксен яқин масофадан туриб уни доғда қолдира олмади.
Аммо айнан у ҳимоядан чиқишда хато пас берганидан кейин яккама-якка вазиятга чиқиб келган рақибга фол ишлатди, белгиланган пеналтини эса Ҳойлунд аниқ ижро этиб, ўйин тақдирини ҳал қилди.
Гуруҳда дастлабки икки ўрин эгалари плей-оффга чиқди, португаллар 4 ўйинда 12 очко жамғарди ва қолган икки турдаги натижалардан қатъи назар, иккинчи ўриндан пастга тушиб кетмайди. Учинчи ўрин эгаси (Уэлс ёки Норвегия) В лигасидан учинчи ўрин билан чиққан жамоага қарши ўтиш ўйинида иштирок этади.
Юрген Клоппнинг таркиб билан қилган тажрибаси ўзини оқламади. Ўтган якшанба куни Аугсбургдаги ўйинда Греция немисларнинг бутунлай бошқа таркибини мағлуб этиб қайтганди. Афинадаги ўйинда немислар бутунлай бошқа таркиб билан ҳаракат қилди, аммо бу сафар ҳам грекларни мағлуб этолмади – 0:0.
Биринчи бўлимда Йонатан Буркардт Дерри Шерҳантнинг пасидан дарвозани ишғол этганди, аммо гол инобатга олинмади – Том Бишоф ҳужумнинг бошланғич қисмида тўпни қўли билан ўйнагани маълум бўлди. Немислар биринчи бўлимда зарбалар сони бўйича яққол устунликка эга бўлди (13:1), аммо иккинчи бўлимда дарвоза соҳасига борган атиги биргина зарба йўллай олди.
Юрген Клопп даврида Германия ҳозирча тўрт ўйинда атиги беш очко жамғарди ва Греция дарвозасига 180 дақиқада йўл топа олмади.
Греция Нидерландия ва Германия бор гуруҳда 4 турдан кейин иккинчи ўринни эгаллаб турибди. Агар Германия қолган икки турда вазиятни ўнглай олмаса, учинчи ўринда қолиши ва А лигада қолиш учун ўтиш ўйинларида майдонга тушиши керак бўлади.
Ирландия ва Исроил ўртасида Сербияда бўлиб ўтган иккинчи ўйинда кучлар тенг келди. Биринчи бўлим охирларида Жимми Данн Дор Перецнинг фолидан кейин пеналти ишлади, ирландлар тўпурари Трой Пэрротт эса 11 метрдан аниқ зарба берди. Иккинчи бўлим бошида Перец ўз хатосини тўғрилаб, ҳисобни тенглаштирди.
Ўйинда шу ҳисоб сақланиб қолди. Ирландия медиаси ёзишича, танаффусда жамоалар ўртасида кичик можаро рўй берган, тортишув чоғида исроиллик футболчилардан бири Ирландия миллий жамоасининг жисмоний тайёргарлик бўйича мураббийи Дэмен Дойлнинг юзига тупуриб юборган.
Ўйин якунланганидан кейин эса футболчилар аввалги ўйинда бўлгани каби бир-бирига қўл беришмаган.
Косово ва Австрия ўйини дуранг ҳисоб билан якунланди. 70-дақиқада Фисник Аслани жарима майдони ташқарисидан аниқ зарба йўллаганди, 15 дақиқа ўтиб Кристоф Ланг бошда йўллаган зарбаси билан мувозанатни тиклади. Ушбу гуруҳда биринчи ўрин эгаси А лигасига ўтади, иккинчи ўрин соҳиби – А лигасидаги учинчи ўрин эгаларидан бирига қарши ўтиш баҳсида иштирок этади, учинчи жамоа В лигада қолади, тўртинчиси қуйи дивизионга тушиб кетади.
Озарбойжон уйда Литвадан устун келди – 1:0. Биринчи бўлим ўрталарида «Сабоҳ» яримҳимоячиси Абдула Ҳайбулаев урган гол ягоналигини сақлаб қолди. Литваликлар ўйин охирида ҳужумчи Армандас Кучиснинг ҳакам билан тортишувидан кейин озчилик ҳам бўлиб қолишди.
Энди ушбу икки жамоадан қайси бири Лихтенштейнга кўпроқ гол ура олса, гуруҳ ғолиблигини ўз қўлига олади. Аммо ушбу жамоада ҳам гуруҳ пешқадамлиги учун имконият сақланиб қолмоқда.
