Иштихонда икки бола хатна қилинганидан кейин вафот этди. Уларнинг иккиси ҳам соғлом ҳолда туман тиббиёт бирлашмасига олиб келиниб, суннат қилинган, лекин тегишли тартиблар қўпол равишда бузилган: болалардан на таҳлил олинган, на бирор жойда бу амалиётлар қайд этилган. Эътиборлиси, жарроҳлардан бири боланинг ўлимидан кейин юқорироқ мансабга кўтарилиб кетган.
Kun.uz мухбири Иштихонда бўлиб, воқеа тафсилотларини ўрганди.
Маълум бўлишича, 2026 йил 22 март куни беш ёшли Элхан Турсунов туман тиббиёт бирлашмасида хатна қилинган. Орадан бир кун ўтиб, боланинг аҳволи ёмонлашган. Кесилган жойдан қон кетиш бошланган.
Шундан сўнг Элёр Ражабов ўғлини шифохонага олиб борган. Болани хатна қилган жарроҳ Азиз Худойбердиев билан телефон орқали боғланишганида, у ишда эмаслиги сабаб бемор болани ҳамкасби Жавлон Мелиевга кўрсатишларини айтган.
“Жавлон Мелиев ўғлимни олиб кириб, тахминан 20 дақиқа давомида тиббий ёрдам кўрсатди. Операция қилинган жойни боғлаб қўйди ва бизга ҳаммаси яхши эканини, хавотир олмаслигимизни айтди. Лекин кечга бориб ўғлимнинг иссиғи кўтарилиб кетди”, дейди Ражабов.
Боланинг ота-онаси бу кунлар давомида операция қилган шифокор билан телефон орқали боғланиб туришган ва тавсияларини бажаришган. Аммо болада ўзгариш бўлмаган, аксинча аҳволи ёмонлашиб бораверган.
“27 март куни жарроҳ Худойбердиевни уйга чақиртирдик. У боланинг ҳолатини кўриб: “Шамоллатиб қўйибсизлар, ўтиб кетади”, деди. Ўша пайтда ҳолатга гувоҳ бўлиб турган ҳудудий ҳамширамиз эътироз қилди, боланинг аҳволи ёмонлашаётганини айтди. Шундан сўнг ўғлимни яна шифохонага олиб бордик. Уни жонлантириш бўлимига олиб киришди, тахминан ярим соатлардан сўнг жони узилганини айтишди”, дейди боланинг отаси.
Шифокорлардан изоҳ олиш учун Иштихон туман тиббиёт бирлашмасида бўлдик. Элхан эртаси куни шифохонага олиб борилган вақтда унга тиббий ёрдам кўрсатган Жавлон Мелиевнинг айтишича, ҳамкасби Азиз Худойбердиев ундан бир кун аввал хатна қилинган болага тиббий ёрдам кўрсатишни сўраган.
Мелиев эски қон изларини тозалаб, бир муддат кузатиб тургани, кейин ўрнини боғлаб қўйганини билдирди. Жарроҳ болада алоҳида ножўя ҳолатларни кўрмагани учун уйига жавоб бергани, кечқурун боғланган бинтни олиб ташлаш кераклигини тавсия қилганини айтди.
