Тошкентда нарколабораториядан 1 млн долларлик синтетик гиёҳвандлик моддалари топилди

Тошкентнинг Миробод туманида синтетик гиёҳвандлик моддаларини ишлаб чиқариш билан шуғулланиб келган шахс қўлга олинди. Бу ҳақда Kun.uz’га пойтахт ИИББ Ахборот-мультимедиа маркази хабар берди.

Қайд этилишича, Миробод туманида жиноят қидирув бошқармаси — тезкор қидирув хизмати ҳамда Давлат хавфсизлик хизмати ходимлари томонидан тезкор тадбир ўтказилган. Тадбир жараёнида қўлга олинган шахс бир нечта манзилда жойлашган гиёҳвандлик моддалар лабораториясидан фойдаланиб, синтетик гиёҳвандлик моддаларини ишлаб чиқариш билан шуғулланиб келгани маълум бўлган. Ана шундай манзиллардан бири Яшнобод туманидаги кўп қаватли уйлардан бирида аниқланган.

Шунингдек, фуқаронинг Тошкент вилоятида жойлашган хонадони кўздан кечирилганида синтетик гиёҳвандлик воситалари, турли хил контейнерлар, қўлқоплар, тарози, газга қарши ниқоблар борлиги аниқланиб, ашёвий далил сифатида ҳужжатлаштириб олинган.

Шу куни биринчи лабораториядан 4,8 килограмм, иккинчи хонадондан қарийб 10 килограмм, жами 14 килограмм 795 грамм умумий нархи тахминан 1 миллион долларга тенг синтетик гиёҳвандлик воситаси аниқланиб, холислар иштирокида расмийлаштириб олинган.

Ашёвий далиллар Тошкент шаҳар ИИББ ЭКМ томонидан экспертизадан ўтказилган. Марказ хулосасига кўра, олинган моддаларнинг барчаси синтетик гиёҳвандлик моддалар экани ўз тасдиғини топган.

Ҳолат юзасидан Миробод тумани ИИО ФМБ тергов бўлими томонидан Жиноят кодексининг 273-моддаси (гиёвандлик воситалари, уларнинг аналоглари ёки психотроп моддаларни ўтказиш мақсадини кўзлаб қонунга хилоф равишда тайёрлаш, олиш, сақлаш ва бошқа ҳаракатлар қилиш, шунингдек уларни қонунга хилоф равишда ўтказиш) 5-қисми билан жиноят иши қўғатилган. Гумон қилинувчига нисбатан қамоқ эҳтиёт чораси танланган. Тергов ҳаракатлари давом этмоқда.