Непалдаги даҳшатли сув тошқинида 100 га яқин киши ҳалок бўлди

Непал туризм бошқармасига таяниб BBC нашрининг хабар беришича, 26 август куни сув тошқинидан жабр кўрган ҳудудда саёҳат қилаётган камида 384 нафар сайёҳ билан алоқа узилган. Уларнинг 291 нафари хорижликлар, жумладан, юздан ортиғи Ҳиндистон фуқароси, 17 нафари Малайзия фуқароси ва 12 нафари британияликдир.

Бедарак йўқолганлар орасида Расува туманидаги гидроэлектр станцияси қурилишида ишлаган саккиз нафар Жанубий Корея фуқароси ҳам бор, деб хабар берди Yonhap. Яна 10 нафар кореялик ҳудуддан чиқа олмай, қутқарувчиларни кутмоқда.

Чоршанба оқшомига келиб 95 кишининг ўлими тасдиқланди, деб хабар берди AFP ва Reuters агентликлари Непал полициясига таяниб.

Непал пойтахти Катмандуда яшовчи хитойлик тадбиркор И Лёнг ўз компаниясига тегишли еттита контейнер ташувчи кема сув тошқини ҳудудида эканини айтди. Ходимлар билан барча алоқа узилган. Унинг сўзларига кўра, табиий офат ҳақида ҳеч қандай огоҳлантириш бўлмаган.

«Бу ерларда, айниқса, ёмғирлар мавсумида вақти-вақти билан сел оқимлари ва кўчкилар бўлиб туради, аммо бу галгиси анча жиддийроққа ўхшайди», — деди тадбиркор.

Непал ташқи ишлар вазири Шишир Ханалнинг айтишича, дастлабки маълумотларга кўра, кутилмаган сув тошқинига кўчки сабаб бўлган, кўчки эса ўз навбатида чоршанба куни эрталаб, маҳаллий вақт билан тахминан соат 8:37 да юз берган зилзила туфайли келиб чиққан.

Потсдамдаги Гелмголс маркази (Германиядаги геология фанлари тадқиқот маркази) чоршанба куни эрталаб Непалда 4,4 магнитудали зилзилани қайд этган.

Катмандудаги Тоғли ҳудудларни комплекс ривожлантириш халқаро маркази ходими Сянгун Чжан ва бошқа олимларнинг фикрича, сув тошқинига Непал томонидаги Лхенде-Кхола дарёсига қор кўчкисининг тушиши туртки бўлгани тахмин қилинмоқда.

Непал ТИВ раҳбарининг сўзларига кўра, вайронагарчиликлар нафақат Непалда, балки Хитойда ҳам кузатилмоқда ва ҳар икки давлат ўз ҳаракатларини мувофиқлаштирмоқда. 70 дан ортиқ ҳарбий ва полициячи, шунингдек, божхона ва чегара назорати ходимлари бедарак йўқолган деб ҳисобланмоқда.

Йўллар, кўприклар, коммуникациялар ва гидроэнергетика инфратузилмаси жиддий шикастланган. Энг кўп вайронагарчилик Непалнинг Расува ва Нувакот (Багмати провинцияси) туманларида кузатилган.

Хитой ҳукумати ҳозирча сув тошқини оқибатлари ҳақида хабар бермади. Хитой раиси Си Жинпинг одамларни қидириш ва жабрланганларга ёрдам кўрсатиш учун «барча чораларни кўришга» буйруқ берди, деб хабар қилди «Синхуа».

Тибетдаги чегара шаҳри Гйиронгга камида 574 нафар қутқарувчи юборилган. Улардан бири Хитойнинг CCТВ давлат телеканалига жабрланган ҳудудга олиб борадиган йўлни тўсиб қўйган бир ярим метрлик лой ва балчиқ қатлами туфайли қутқарувчилар Гйиронгга етиб бориши учун тўрт соатдан кўпроқ вақт керак бўлишини айтган.