Депутат педофиллар учун умрбод қамоқ жазоси жорий этишни таклиф қилди

Дилноза Азизова сўзларига кўра, педофилларнинг жазо муддатини «яхши хулқ» баҳонаси билан қисқартириб, кўчада эркин юргани «давлатнинг болага бўлган муносабатидан дарак».

Фото: Миллий тикланиш партияси

Олий Мажлис Қонунчилик палатаси депутати, «Миллий тикланиш» партияси аъзоси Дилноза Азизова болаларга нисбатан ҳар қандай жинсий зўравонлик учун умрбод қамоқ жазосини жорий этишни таклиф қилди.

Депутат Наманган вилоятининг Янгиқўрғон туманида 7 ёшли қиз ўз қариндоши бўлган катта ёшли эркак томонидан зўрлангани ҳақидаги воқеага шундай муносабат билдирди.

«Намангандаги воқеа — фақат бир педофилнинг разолати эмас, бу жиноятни йиллар давомида «ахлоқ тузатиш ишлари» деган юмшоқ ифода билан оқлаб келган тизимнинг юзи. Боланинг ҳаёти билан ўйнаш мумкин эмас. Бу фақат жиноят эмас — инсонийликка қарши қўзғолон», деб ёзди Азизова.

Унинг сўзларига кўра, педофиллар жазо муддатини «яхши хулқ» баҳонаси билан қисқартириб, кўчада эркин юргани «давлатнинг болага бўлган муносабатидан дарак».

«Қонун фақат қоғозда эмас, ҳаётда ҳам қаттиқ бўлиши керак. Бундай жиноятчилар учун кечириш, енгиллик ёки «яхши хулқ» деган гап бўлмаслиги шартлигининг яна бир исботига гувоҳ бўлдик... Менинг талабим қатъий, болаларга нисбатан ҳар қандай жинсий зўравонлик учун умрбод озодликдан маҳрум қилиш жазосини қонун даражасида белгилашнинг вақти келди», деб ёзди Азизова.

Депутат сўзларига кўра, «педофилларга енгил муносабатда бўлсак, демак, келажакни қўлимиз билан йўқ қиляпмиз».

Тайёрлаган: Сардор Юсупов

#педофилия #умрбод қамоқ #Дилноза Азизова