«Реал» ФИФАнинг қарорини мутлақо адолатсиз деб ҳисоблади

«Реал» клуби ФИФА томонидан қўйилган трансфер тақиқи юзасидан баёнот берди.

«Бугун «Реал» ФИФА тартиб-интизом қўмитасининг қарорини олди. Унда кейинги иккита трансфер муддати давомида янги футболчиларни рўйхатдан ўтказиш тақиқланган ва жамоага 360 минг франк жарима солинган.

«Реал»ни қуйидаги бандлар бўйича жаримага тортишган:

1. 18 ёшга тўлмаган футболчилар Испания футбол федерациясида рўйхатдан ўтмасдан ўйнагани тўғрисида;
Бу мутлақо нотўғри. Ёшлар жамоаларимизда ўйнаган футболчиларнинг барчаси майдонга чиқишдан олдин Федерацияда рўйхатдан ўтказилган. Буни тасдиқловчи ҳужжатимиз бор. У 2015 йил 17 апрель санаси билан рўйхатга олинган.

2. 18 ёшга тўлмаган хорижлик футболчи билан шартнома имзолаш, уларнинг Испаниядаги регистрацияси қонунга зид равишда амалга оширилгани ҳақидаги айблов;
Бу айблов ҳам асоссиз. «Реал» ҳамиша ФИФАнинг барча талабларига бўйсуниб келган.

12-18 ёшдаги футболчилар ФИФАнинг талабларига мос равишда рўйхатдан ўтказилган ва Испания футбол федерациясидан тегишли рухсатнома олинган.

12 ёшга тўлмаган испаниялик футболчилар учун эса регистрация талаб қилинмайди. Бу Федерация ва ФИФА талабига мос.

3. Ўйинчиларни Испания футбол федерациясида рўйхатдан ўтказмасдан ўйнатиш;
Бу ҳақидаги айблов ҳам нотўғри. «Реал»нинг барча ёшлар жамоалари академияга бирлаштирилган бўлса-да, футболчиларни рўйхатдан ўтказиш ҳақидаги хабар ҳамиша Испания футбол федерациясига бериб турилган. Уларнинг ҳар бирида тегишли лицензия бор. Буни исботлаб бера оламиз.

«Реал» ФИФАнинг қарорини мутлақо адолатсиз деб ҳисоблайди ва бу қарорга қарши курашади», – дейилади «Реал»нинг баёнотида.

ФИФА «Реал» ва «Атлетико»га янги футболчиларни рўйхатдан ўтказишни тақиқлади