Бектемир Мелиқўзиевнинг рақиби бегона эмас: реванш муносиб олинадими?

Рио Олимпиадасининг бугунги, 20 август куни бўлиб ўтадиган баҳсларида 75 кг вазн тоифасида Ўзбекистон боксчиси Бектемир Мелиқўзиев финал учрашувида кубалик спортчи Лопез Арлен билан рингга кўтарилади.

Бектемир Олимпиада ўйинлари доирасида бунгача 1/8 финал босқичида австралиялик Дэниэль Льюисни, чорак финалда ҳиндистонлик боксчи Викас Крижанни, ярим финалда эса мексикалик Мисаэль Родригесни мағлуб этди ва финалга чиқди.

Бектемир Мелиқўзиев 1996 йилнинг 8 апрель куни Фарғонада туғилган.

Бектемир ўз фаолиятини ҳаваскорлик боксидан бошлаган. 2014 йилнинг январь ойида ҳаваскор боксчилар ўртасида ўтган Осиё чемпионатида 69 кг.гача бўлган вазн тоифасида Осиё чемпиони, худди шу йилнинг апрель ойида ўтган ёшлар ўртасидаги жаҳон чемпионатида 69 кг.гача бўлган вазн тоифасида жаҳон чемпиони ва 2014 йилнинг август ойида ёшлар ўртасида ўтган Олимпиада ўйинларида 69 кг.гача бўлган вазн тоифасида чемпион бўлган.

2014 йилда эса 75 кг.гача бўлган вазн тоифасида Ўзбекистон, 2015 йилда эса Осиё чемпиони бўлган. 2015 йилги жаҳон чемпионатида эса финалга қадар етиб борган ва ўша баҳсда кубалик Арлен Лопезга мағлуб бўлган.

Унинг рақиби кубалик боксчи Арлен Лопез 1993 йилнинг 21 февраль куни Кубанинг Гуантанамо шаҳрида туғилган. 2015 йилги жаҳон чемпиони. Миллий чемпионатнинг бир неча бор совриндори.

У Рио Олимпиадасидаги баҳсларда дастлаб венгриялик спортчи З. Харжани,чорак финалда эса франциялик К. Мбеллени ва ярим финал баҳсида озарбайжонлик боксчи Камрон Шоҳсуворлини мағлуб этди.