Обама «Мэттью» довули туфайли Флорида, Жанубий Каролина ва Жоржияда фавқулодда ҳолат эълон қилди

АҚШ президенти Барак Обама яқинлашиб келаётган «Мэттью» довули туфайли мамлакат жанубидаги 3та штатда фавқулодда ҳолат режимини жорий қилди ва маҳаллий ҳукуматга федерал ёрдам кўрсатишни буюрди. Оқ уй тарқатган хабарга кўра, аввалига Флорида, кейин Жанубий Каролина ҳамда Жоржия штатларида фавқулодда ҳолат тартиби жорий этилган.

Давлат раҳбари миллий хавфсизлик вазирлиги ҳамда Фавқулодда вазиятларда бошқарув бўйича федерал агентликка табиий офатнинг эҳтимолий оқибатларига қарши курашга қаратилган ҳаракатларни мувофиқлаштиришга фармон берган.

Оқ уй матбуот котиби Жош Эрнест «Мэттью» кутилганидан кўра кучлироқ бўлиб чиққанини маълум қилган.

АҚШнинг жануби-шарқий штатлари — Флорида, Жоржия, Жанубий ва Шимолий Каролинанинг ҳукуматдан эвакуация ҳақида тавсия олган аҳолиси сони 2 миллион кишидан ошади.

Бу довул туфайли ҳалок бўлганлар сони 350 нафарга яқинлашди. Уларнинг аксари Гаити фуқароларидир. Довул бугун куннинг иккинчи ярмида Америкага ёпирилиши кутилмоқда.