АҚШ Сенатининг терговлар бўйича доимий қуйи қўмитасидаги (PSI) етакчи демократ Ричард Блументал эҳтимолий молиявий қонунбузарликлар ва манфаатлар тўқнашувини тергов қилиш доирасида Binance криптобиржаси, Tether компанияси ҳамда президент Доналд Трамп билан алоқадор криптолойиҳа вакилларидан ҳужжатларни тақдим этишни талаб қилди. Буни 2027 йил 4 январга қадар бажариш лозим. Талаб бажарилмаган тақдирда, сенаторлар мажбурий чораларни қўллаш билан огоҳлантирди.
Мурожаат йўлланганлар орасида президент оиласига алоқадор World Liberty Financial (WLFI) ва Fight Fight Fight LLC компаниялари ҳам бор. Блументал ушбу тузилмалар федерал жиноий таъқиб остида бўлган хорижликлар билан молиявий операцияларни амалга оширган бўлиши, чет эл ҳукуматларидан инвестициялар жалб қилгани ва давлат этикаси талабларини бузган бўлиши мумкинлиги ҳақидаги хабарлардан сўнг, 2025 йилнинг май ойида уларнинг фаолиятини текширишга киришган эди.
Binance криптобиржаси ҳамда энг йирик USDT стейблкоинини муомалага чиқарувчи Tether компанияси эса санкцияларни четлаб ўтиш ва Трамп маъмурияти билан тузилган битимлар юзасидан текширилмоқда. 2026 йил сентябрида қуйи қўмита демократлари Эроннинг яширин банк тизимида USDT’дан фойдаланилгани тўғрисида ҳисобот эълон қилди. Шунингдек, мазкур давлат билан боғлиқ 1,7 миллиард доллардан зиёд транзакциялар ҳақидаги хабарлар ортидан Binance’га нисбатан ҳам саволлар туғилди. Бундан ташқари, қонунчилар биржанинг WLFI билан ҳамкорлигида манфаатлар тўқнашуви борлигидан шубҳаланмоқда. Аввалроқ бир гуруҳ сенаторлар президент томонидан Binance асосчиси Чанпен Чжаонинг қамоқдан афв этилиши ҳолатларини текширишни талаб қилган эди.
2026 йилнинг июль ойида Блументал Трамп оиласининг криптобизнесига бағишланган оммавий эшитувлар ўтказди. Унда, хусусан, TRUMP мемкоини сармоядорларининг кўрган зарарлари муҳокама қилинди; президент эса ўзига алоқадор криптолойиҳалардан 1,4 миллиард доллардан ортиқ даромад олган.
Сенатор, шунингдек, АҚШ ички хавфсизлик вазири Маркуэйн Маллин, Федерал алоқа комиссияси раиси Брэндан Карр ҳамда Оқ уй бал залининг қурилишини молиялаштиришга алоқадор технологик компанияларга ҳам расмий огоҳлантириш юборди. Ушбу текширувлар иммиграция хизматлари томонидан мансаб ваколатларининг суиистеъмол қилиниши, матбуотга босим ўтказилиши ҳамда эҳсонлар эвазига давлат имтиёзлари берилган бўлиши мумкинлиги каби ҳолатларни қамраб олади.
