Британия парламенти Brexit жараёнини бошлашни маъқуллади

Буюк Британия парламенти мамлакат бош вазири Тереза Мэйга Бирлашган Қиролликнинг Европа Иттифоқи таркибидан чиқиш жараёнини бошлаши учун ваколатларни берди. Парламент шу мазмундаги махсус қонун лойиҳасини қабул қилди, деб хабар қилмоқда Associated Press.

Таъкидланишича,, парламентнинг юқори палатаси – лордлар палатаси ҳукуматнинг қонун лойиҳасига тузатишлар киритмаган. Шу билан, бир ойдан узоқ вақтдан бери давом этиб келаётган қонунчилик жараёнига чек қўйилди. 

Қонун лойиҳаси иккала палата томонидан маъқулланган бўлиб, энди уни қиролича Елизавета II имзолаши керак. Шундан сўнг, у қонун мақомига эга бўлади, бош вазир расман Brexit жараёнини бошлай олади. 

Аввалроқ, Британия парламенти умумпалатаси Brexit қонун лойиҳасига тузатишларни рад этгани хабар қилинган эди.