Европа Иттифоқи Гренландияга инвестицияларни сезиларли даражада кўпайтириш ниятида. Европа комиссияси раиси Урсула фон дер Ляйен 7 сентябр куни Дания таркибидаги автоном ҳудудга ташрифи чоғида янги инвестиция режаларини тақдим этиши кутилмоқда.
Молиялаштириш, жумладан, муҳим минералларни қазиб олиш ва қайта ишлаш, сунъий йўлдош алоқасини ривожлантириш ҳамда қайта тикланадиган энергетика соҳаларига йўналтирилади.
Фон дер Ляйен 6 сентябр куни Гренландия маъмурий маркази Нуук шаҳрида янги молиявий пакет «сезиларли ҳажмда» бўлишини маълум қилди.
Гренландия бош вазири Йенс-Фредерик Нилсен эса автоном ҳудуд Европа Иттифоқи билан яқин дўстлик муносабатлари ва мустаҳкам шерикликни ривожлантиришни исташини билдирди.
Европа комиссияси раиси Гренландияга икки кунлик ташриф билан келган. Ташрифдан кўзланган мақсадлардан бири Гренландия ва Дания ҳукуматларини қўллаб-қувватлаш экани айтилмоқда.
Арктиканинг геосиёсий аҳамияти ошиб бормоқда
Гренландия атрофидаги жараёнлар Арктиканинг жаҳон сиёсати ва иқтисодиётидаги аҳамияти ортиб бораётган бир пайтга тўғри келмоқда.
Музликларнинг эриши минтақадаги табиий ресурслардан фойдаланиш имкониятларини кенгайтирмоқда. Шу билан бирга, янги денгиз йўлларининг пайдо бўлиши Арктиканинг транспорт ва ҳарбий-стратегик аҳамиятини ҳам оширмоқда.
Айниқса, Гренландиядаги муҳим минераллар захиралари йирик давлатлар эътиборини тортмоқда. Шу сабабли орол иқтисодий манфаатлар билан бир қаторда геосиёсий рақобат нуқталаридан бирига айланиб бормоқда.
АҚШ президенти Доналд Трамп жорий йилда АҚШ Гренландия устидан назорат ўрнатиши кераклигини бир неча бор таъкидлади. У Дания Гренландия хавфсизлигини етарли даражада таъминлай олмаслигини иддао қилган.
Копенгаген ва Нуук ҳукуматлари эса АҚШ президентининг бундай талабларини қатъий рад этган.
Июль ойида Туркияда ўтказилган НАТО саммитида Трамп Гренландияга нисбатан ўз позициясини яна бир бор тасдиқлаган.
ЕИ Гренландияда молиялаштириш йўналишларини кенгайтиради
Гренландия 1985 йилда Европа ҳамжамиятидан чиққан. Шунга қарамай, Европа Иттифоқи узоқ йиллардан буён автоном ҳудудга молиявий ёрдам кўрсатиб келади.
