Exit-poll. Асосий номзодларнинг натижалари бўйича илк маълумотлар берилди

Франциядаги президентлик сайловида Париж вақти билан соат 12:00 ҳолатига кўра, экзитполларнинг илк натижалари эълон қилинди.

Бельгиядаги RTBF телеканали маълумотига кўра, exit polls (сайлов участкасидан чиқишдаги фуқаролар ўртасидаги ижтимоий сўров) мамлакатнинг собиқ иқтисодиёт вазири, «Маршда» ҳаракати асосчиси Эмманюель Макрон устунликка эришаётганини кўрсатган. Унинг натижаси 24 фоизга тенг бўлиб турибди. Иккинчи ўринда «Миллий фронт» етакчиси Марин Ле Пен — 22 фоиз, учинчи ўринда собиқ бош вазир, «Республикачилар» партияси вакили Франсуа Фийон — 20,5 фоиз, тўртинчи ўринда эса  «Бўйсунмаган Франция» ҳаракати вакили Жан-Люк Меланшон — 18 фоиз.

Бундан олдинроқ 22 апрель куни Франциянинг денгиз орти ҳудудларида ўтказилган сайлов натижаларига кўра, Меланшон устун келгани ҳақида хабар берилганди.