Бугун, 18 май куни Озарбойжон пойтахти Боку шаҳрида IV «Ислом бирдамлиги спорт ўйинлари»нинг еттинчи кунги мусобақалари давом этди. Шу куни Ўзбекистон делегацияси медаллар жамғармаси яна 9та медаль билан бойиди (6та олтин, 2та кумуш ва 1та бронза). 

Бугун ўзбекистонлик 14 нафар спортчи 5та спорт турида иштирок этишди.

Енгил атлетика
Пара-атлетика йўналишида иштирок этаётган Александр Свечников эркаклар ўртасидаги найза улоқтириш (F13) баҳсларида тенгсиз бўлди ва олтин медаль олди. У найзани 70 м масофага улоқтирди ва жаҳон рекордини ўрнатди.

Баландликка сакраш машқларида 1,80 натижани қайд этган Надия Дўсанова олтин медалга эга бўлди.

200 метр масофага югуришда финал босқичида иштирок этган Нигина Шарипова эса маррага учинчи бўлиб етиб келди (23,66 секунд) ва бронза билан тақдирланадиган бўлди.

Босқон улоқтириш бўйича финалда иштирок этган Сухроб Хўжаев эса натижага эриша олмади.

Спорт курашлари
Юнон-рум кураши бўйича баҳсларда 130 кг вазн тоифасида иштирок этган Мўминжон Абдуллаев дастлаб суриялик Р.Алкрадни енгди, кейин озарбойжонлик С.Шариати тўсиғидан ўтди. Финалда туркиялик Осман Йилдиримга имкониятни бой берган Абдуллаев кумуш медаль билан кифояланадиган бўлди.

66 кг вазн тоифасидаги Мирзобек Раҳматов эса чорак финалда марокашлик А.Ҳанинени енгди, аммо ярим финалда озарбойжонлик К.Маммадовга ютқазди. У бронза учун баҳсда  эронлик М.Зайдванддан ҳам енгилди.

Таэквондо WTF
-62 кг вазн тоифасида турнирда финалга етиб келган Умида Абдуллаева Туркия вакили Ирем Яманга қарши даянга чиқиб, 1:3 ҳисобида ютқазиб қўйди ва кумуш медаль билан кифояланди. У кун давомида дастлабки жангида покистонлик Ямна Сиддиқийни (20:0), чорак финалда Қозоғистон вакили Гулим Бибалаевани(4:3) ярим финалда марокашлик Саукайна Элаунийни (5:4) мағлуб этганди. 

-74 кг вазн тоифасида даянга чиққан Никита Рафалович барча рақибларини мағлубиятга учратиб турнирнинг олтин медалини қўлга киритди. Саралашдан озод қилинган Рафалович, биринчи жангда иорданиялик А.Аладарбини енгди, у финалда эронлик кучли рақиби Хусровфарни мағлубиятга учратиб, шоҳсупанинг энг юқори поғонасига кўтарилди.