Олмазор туманида автомобил йўлида рақсга тушган шахслар маъмурий жазога тортилди. Kun.uz суд қарори билан танишди
Суд ҳужжатига кўра, 19 ёшдан 30 ёшгача бўлган 8 киши 31 октябр куни туманнинг Гулсарой кўчасида йўлнинг қатнов қисмида рақсга тушиб, машиналар ҳаракатига тўсқинлик қилган.
“Йўлни тўсиб, озгина ўйин-кулги қилдик. Бунақа ҳолатга олиб келишини ўйламагандик. Қилган ишимиздан пушаймонмиз, бошқа қайтарилмайди”, деган ҳуқуқбузарлардан бири судда.
Куёвжўралардан яна бири ўша куни соат 16:00 ларда келиннинг уйидан чиқаётганда “озгина хурсандчиликка, эмоцияга берилиб”, йўлни тўсиб қўйишганини, оқибати шу ёққача келишини билмаганини айтиб, пушаймонлик билдирган.
ЖИБ Олмазор туман судининг 2026 йил 3 ноябрдаги қарори билан куёвжўралар майда безорилик ҳуқуқбузарлигини содир этган деб топилди. Уларнинг бирига 5 сутка, қолганларига 7 суткадан маъмурий қамоқ жазоси тайинланди.
