Швейцарияликлар бор-йўғи битта стрелкага эга соат ишлаб чиқаришди

Швейцарциянинг IWC Schaffhausen соатсозлик мануфактураси Женевада 2018 йил январда ўтадиган юқори даражадаги соатсозлик санъати халқаро кўргазмасида (SIHH) намойиш қилинадиган янги соатларни тақдим қилди.  

Кўргазма вақтида Portugieser, Portofino, Pilot’s Watches ва Da Vinci линияларининг 27 та янги моделидан иборат коллекция тақдим қилинади. 

Кўргазмада тақдим қилинадиган антиқа соатлардан бири IWC Tribute to Pallweber Edition “150 Years” бўлиб, унда фақат сонияни кўрсатувчи стрелка мавжуд ҳамда IWC 94200 механизми билан жиҳозланган. Модель 1884 йилда ишлаб чиқарилган чўнтак соатларидан илҳомланиб ясалган: унинг циферблатидаги соат ва дақиқалар кичик дарчаларда пайдо бўладиган рақамлар ёрдамида тасвирланади. Бу рақамлар айланувчи дискларга туширилган.   

Portugieser Constant-Force Tourbillon Edition “150 Years” модели платинадан ишланган корпусда, лакланган циферблатга эга бўлиб, бир айлантириши 96 соатга етадиган мурват билан жиҳозланган. Механизмда илк бор доимий куч турбийони (соат юришидаги четланишни компенсацияловчи қурилма) ва 577,5 йилда бир кунга тўғриланиши керак бўлган Ой фазалари кўрсатгичи уйғунлаштирилган.  

Аёллар учун мўлжалланган Da Vinci Automatic Moon Phase 36 Edition “150 Years” модели 18-каратли пушти олтиндан ишланган корпусда бўлиб, 12 рақамида Ой фазалари кўрсатгичи билан жиҳозланган. Соат корпуси ва мурвати 206 та бриллиант билан қопланган. Модель  чекланган миқдорда – 50 дона қилиб ишлаб чиқарилган. Da Vinci сериясининг яна бир янги соати – Da Vinci Automatic Edition “150 Years” мовий рангдаги лакланган циферблат билан жиҳозланган. Соат 60 соат юришга етувчи Пеллатон автоматик мурвати билан жиҳозланган ва зангламайдиган пўлатдан ишланган корпус ичига ўрнатилган. 

Van Cleef & Arpels заргарлик-соатсозлик уйи Женевадаги кўргазмада Lady Arpels Planétarium моделини тақдим қилади. Бу Midnight Planétarium соатининг аёллар учун мўлжалланган версияси бўлиб, унинг циферблатида Қуёш тизимидаги сайёралар юриши аксланади.