“Том ва Жерри” мультфильми муаллифларидан бири 99 ёшида вафот этди

АҚШда Disney, Warner Bros ва Hanna-Barbera студияларида рассом-мультипликатор бўлиб ишлаган, Багз Банни, Том ва Жерри, Даффи Дак, Элвин ва бурундуқлар, денгизчи Папай мультқаҳрамонлари муаллифларидан бири Боб Гивенс 99 ёшида вафот этди.

Рассомнинг вафот этгани ҳақида унинг қизи “Фейсбук”да маълум қилган. Қария 13 декабрда ўткир нафас етишмаслигидан вафот этган.  

Гивенс мактабни битиргач, 1937 йилда Disney студиясига ишга кириб, бу ерда Дональд Дак ва Оппоқой ҳақидаги мультфильмлар яратилишида иштирок этган. У 1940 йилда Warner Bros студиясига ўтиб, у ерда қуёнча Багз Банни мультқаҳрамонини яратган. Гивенс АҚШнинг номдор студияларида 60 йилдан кўпроқ ижод қилиб, болажонларнинг севимли мультқаҳрамонларини яратиш ишлари бошида турган.