Аҳолини қайта рўйхатга олиш концепцияси тайёрланади

2018 йил 10 апрелга қадар Вазирлар Маҳкамаси, вазирлик ва идоралар томонидан давлат органлари фаолиятининг очиқлиги ва уларнинг фуқаролик жамияти институтлари билан ўзаро самарали ҳамкорлигини таъминлаш мақсадида барча давлат органларида жамоатчилик кенгашларини ташкил этиш бўйича норматив-ҳуқуқий ҳужжатлар лойиҳалари ишлаб чиқилади. Бу ҳақда «Фаол тадбиркорлик, инновацион ғоялар ва технологияларни қўллаб-қувватлаш йили» давлат дастури лойиҳасида маълум қилинган.

Бунда давлат органларида фаолият олиб борадиган жамоатчилик кенгашлари ташкил этилади.

2018 йил 1 майга қадар Олий Мажлис палаталари (келишув асосида), Адлия вазирлиги, АҚҲМИ томонидан Олий Мажлис палаталари ва халқ депутатлари Кенгашлари фаолияти тўғрисида жамоатчиликни хабардор қилиш механизмларини янада такомиллаштириш тўғрисида Ўзбекистон Республикаси қонуни лойиҳаси тайёрланади.

Лойиҳада фуқаролар, ўқувчи ва талабаларнинг Олий Мажлис палаталари ва халқ депутатлари Кенгашлари мажлисларида монеликсиз иштирок этиш имкониятлари назарда тутилади.

2018 йил 1 майга қадар Олий Мажлис Қонунчилик палатаси (келишув асосида),

Ахборот технологиялари вазирлиги, ФЖШМҚМИ томонидан Олий Мажлис Қонунчилик палатасида қонун лойиҳаларининг жамоатчилик муҳокамасини самарали ташкил этиш бўйича Олий Мажлис Қонунчилик палатаси Кенгаши қарори лойиҳаси тайёрланади.

Лойиҳада:

Олий Мажлис Қонунчилик палатаси томонидан қонун лойиҳаларининг жамоатчилик муҳокамасини ташкил этиш тартиби;

қонун лойиҳалари муҳокамасига кенг оммани жалб қилишнинг замонавий усуллари,
шу жумладан ахборот-коммуникация технологияларини кенг жорий этиш назарда тутилади.

2018 йил 1 апрелга қадар Олий Мажлис палаталари (келишув асосида), АҚҲМИ, ФЖШМҚМИ, Адлия вазирлиги, Бош прокуратура, Ўзбекистон ёшлар иттифоқи, “Маҳалла” хайрия жамоат фонди, ЭОАВМА, ЎзННТМА, фуқаролик жамиятининг бошқа институтлари томонидан Давлат ва жамият бошқарувида жамоатчилик назоратини амалга оширишнинг таъсирчан ва амалий механизмларини жорий этишни назарда тутувчи “Жамоатчилик назорати тўғрисида”ги Ўзбекистон Республикаси қонуни лойиҳаси ишлаб чиқилади.

Лойиҳанинг қабул қилиниши давлат органларига юклатилган вазифаларни бажариш самарадорлигининг ошишига, улар томонидан инсон ҳуқуқлари, эркинликлари ва манфаатларига риоя этилишига, фуқароларнинг мурожаатларини, уларда кўтарилган муаммоларни жойида ҳал этишда давлат органлари раҳбарлари томонидан қай даражада муносабат билдирилиши устидан жамоатчилик назоратини ўрнатишга имкон беради.

2018 йил 20 февралга қадар Олий Мажлис палаталари (келишув асосида), Ахборот технологиялари вазирлиги, Адлия вазирлиги, “Ижтимоий фикр” жамоатчилик маркази томонидан “Mening fikrim” махсус веб-портали орқали Олий Мажлис палаталарига, халқ депутатлари вилоят, туман ва шаҳар Кенгашларига электрон жамоавий мурожаат қилиш тартибини жорий этиш бўйича норматив-ҳуқуқий ҳужжат лойиҳаси ва амалий чора-тадбирлар тайёрланади.

Сарф-харажатлар 2 млрд сўм этиб белгиланди, Ахборот-коммуникация технологияларини ривожлантириш жамғармаси эса молиялаштириш манбасига айланади.

Бунда:

интернет тармоғида аҳоли долзарб деб ҳисоблаган ташаббусларни киритадиган, у ёки бу муаммога ўз муносабатини билдира оладиган “Mening fikrim” махсус майдонини ташкил этиш;

Олий Мажлис ва халқ депутатлари Кенгашларига электрон жамоавий мурожаат қилиш тартибини жорий этиш;

муайян миқдордаги фуқаролар ташаббусларини ушбу органлар томонидан мажбурий тартибда кўриб чиқиш назарда тутилади.

2018 йил 1 июнга қадар Ахборот технологиялари вазирлиги, Матбуот ва ахборот агентлиги, Адлия вазирлиги, Молия вазирлиги, Инновация вазирлиги, Лойиҳа бошқаруви миллий агентлиги томонидан давлат органлари фаолиятининг янада очиқлигини таъминлаш, улар фаолият йўналишлари бўйича жамоатчилик билан фаол мулоқот олиб боришларини назарда тутувчи Давлат органларининг виртуал муҳитда мавжуд бўлиши концепцияси ишлаб чиқилади.

Ушбу норматив-ҳуқуқий ҳужжатлар лойиҳасида давлат органлари матбуот хизматлари томонидан жамоатчилик фикрини тизимли ўрганиш, давлат органлари ва мансабдор шахслар қабул қилган қарорлар ҳамда воқеаларга нисбатан аҳоли муносабатини кузатиб бориш ва ўз вақтида муносабат билдириш тизими назарда тутилади.

2018 йил 20 августга қадар ФЖШМҚМИ, Адлия вазирлиги, ЎзННТМА, вазирлик ва идоралар томонидан нодавлат нотижорат ташкилотлари фаолиятини давлат томонидан қўллаб-қувватлаш тизимини янада такомиллаштириш бўйича норматив-ҳуқуқий ҳужжатлар лойиҳалари ишлаб чиқилади.

Лойиҳаларда:

ННТларга ижтимоий шериклик доирасида давлат мулкини бепул ёки имтиёзли шартлар асосида бериш;

ижтимоий шерикликни қўллаб-қувватлаган жисмоний ва юридик шахслар учун солиқ ва мажбурий тўловлар бўйича имтиёзлар жорий этиш назарда тутилади.

2018 йил 20 февралга қадар Давлат статистика қўмитаси, ИИВ, Иқтисодиёт вазирлиги, Адлия вазирлиги, Молия вазирлиги томонидан аҳолини қайта рўйхатга олиш концепциясини тайёрлаш бўйича норматив-ҳуқуқий ҳужжатлар лойиҳаси ишлаб чиқилади.

Лойиҳада:

аҳолини қайта ҳисоблаб чиқиш мақсади;

аҳолини қайта ҳисоблаб чиқишда иштирок этувчи субъектлар доираси;

аҳолини қайта ҳисоблаб чиқишда иштирок этувчи давлат органларининг аниқ вазифалари;

аҳолини қайта ҳисоблаб чиқиш механизми назарда тутилади.

2018 йил 20 апрелга қадар Матбуот ва ахборот агентлиги, МТРК, Олий ва ўрта махсус таълим вазирлиги томонидан Журналистика ва оммавий коммуникация воситалари университетини ташкил этиш тўғрисида Ўзбекистон Республикаси Президенти Фармони лойиҳаси тайёрланади.

Лойиҳада:

Журналистика ва оммавий коммуникация воситалари университетини ташкил этиш;

Университетнинг вазифа ва функцияларини аниқ белгилаш назарда тутилади.

2018 йил 20 сентябрга қадар Молия вазирлиги, Ахборот технологиялари вазирлиги, Матбуот ва ахборот агентлиги, Адлия вазирлиги, Иқтисодиёт вазирлиги, Бандлик ва меҳнат муносабатлари вазирлиги, вазирлик ва идоралар томонидан давлат бошқаруви органлари фаолияти очиқлиги ва шаффофлигини таъминлашнинг қўшимча механизмларини жорий этиш бўйича Ўзбекистон Республикаси қонуни лойиҳаси тайёрланади.

Лойиҳада:

давлат органларининг веб-сайтларига улар томонидан амалга оширилаётган бюджет харажатлари ҳақида тўлиқ маълумотларни жойлаштириш мажбурийлиги;

давлат органлари жамоатчилик кенгашлари фаолиятига оид нормаларни белгилаш назарда тутилади.

2018 йил 20 июлга қадар Олий Мажлис Сенати (келишув асосида), Адлия вазирлиги, Фуқароларнинг ўзини ўзи бошқариш органлари фаолиятини мувофиқлаштириш бўйича республика кенгаши, АҚҲМИ, ФЖШМҚМИ томонидан фуқаролар йиғини раиси ва унинг маслаҳатчилари сайлови жараёнини янада такомиллаштириш бўйича Ўзбекистон Республикаси қонуни лойиҳаси ишлаб чиқилади.

Лойиҳада фуқаролар йиғини раиси ва унинг маслаҳатчилари сайловида сайловчиларнинг сайловда иштирок этиш имкониятларини кенгайтириш, маҳалла раислигига номзодлар кўрсатишда ошкоралик ва шаффофликни таъминлаш механизмлари назарда тутилади.

2018 йил 20 августгача Фуқароларнинг ўзини ўзи бошқариш органлари фаолиятини мувофиқлаштириш бўйича республика кенгаши, Адлия вазирлиги, Иқтисодиёт вазирлиги, Молия вазирлиги, Инновация вазирлиги, ДСҚ, Савдо-саноат палатаси, ФЖШМҚМИ, вазирлик ва идоралар томонидан Фуқароларнинг ўзини ўзи бошқариш органларининг тадбиркорлик фаолиятини ривожлантиришга кўмаклашиш тизимини такомиллаштириш бўйича Ўзбекистон Республикаси Президенти қарори лойиҳаси тайёрланади.

Лойиҳада фуқароларнинг ўзини ўзи бошқариш органлари ҳузуридаги тадбиркорлик фаолиятини ривожлантиришга кўмаклашиш бўйича маслаҳат марказлари фаолиятига давлат органлари, тижорат банклари ва бошқа ваколатли идораларнинг кўмаклашувини таъминлаш механизмларини белгилаш, маслаҳат марказлари фаолиятини такомиллаштириш назарда тутилади.