«Трибуна» Испания чемпионатининг 21-тури якунларини келтиради.
Ла Лига рекорди ва пенальтисиз 2 йил
«Барселона» кутилмаганда «Алавес»га қарши ўйинда муаммоларга дуч келди. Биринчи бўлимнинг биринчи қисмида гол ўтказиб юборган каталонияликлар фақат ўйиннинг охирги чорагида вазиятни ўзгартира олишди. Яна Суарес ва яна Месси қутқарди. Ўйин аввалида жамоанинг собиқ футболчиси Эрик Абидал қўлидан Ла Лиганинг декабрь ойидаги энг яхши футболчиси учун аталган совринни қабул қилиб олган уругвайлик ҳужумчи қаторасига саккизинчи ўйинда ҳам гол урди. Бундай кўрсаткич билан жорий мавсумда Европадаги ҳеч бир футболчи мақтана олмайди. Аргентиналик футболчи эса ўйинга қўшиб берилган дақиқаларда жарима зарбасидан ғалаба голини урди. Бу гол унинг чемпионатнинг жорий мавсумдаги 20-голига айланди. Бу ҳам Ла Лига рекорди, шу вақтгача ҳеч бир футболчи қаторасига 10 мавсумда узлуксиз камида йигиртматадан кам гол урмаганди.
Тан олиш керакки, Леонинг голи ноҳақ белгиланган жарима зарбаси орқали рўй берди. Каталонияликлар ҳужум қилаётган вақтда Пако Алькасерга қўполлик ишлатилди, аммо у тўп ўзига узатилган вақтда офсайд ҳолатида эди.
«Алавес»да ҳакамга норозилик билдириш учун яна бир сабаб бор - Мунирнинг зарбасидан кейин тўп жарима майдони ичида Умтитининг қўлига тегди, лекин пенальти белгиланмади.
Эътиборли жиҳати, «Барселона» дарвозасига 74 турдан буён пенальти белгиланмаган, каталонияликлар дарвозаси томон охирги пенальти икки йил муқаддам, 2016 йилнинг 14 февралида қўйилганди.
«Месталья»даги парокандалик
Зиданнинг «Реал»даги тақдирига ойдинлик киритиладиган «ПСЖ»га қарши ўйинга икки ҳафта қолганида мадридликлар жамоани Испания Кубогидан чиқариб юборган «Леганес»га ташаккур билдирса арзийди. Бу жамоадан мағлубиятдан кейин «Реал» ўзига келди ва Валенсияда йирик ғалабага эришди. «Реал» охирги 3 мавсумда «Месталья»дан ғалаба билан қайтмаётганди. Қолаверса, Испания Кубогидан чиқиб кетган жамоада «ПСЖ»га қарши ўйинга тайёрланиш учун кўпроқ вақт бўлади.
