Туркманистонликлар энди пул ишлаб топиш учун Ўзбекистон ва Қозоғистонга кетмоқда

Туркманистонда давом этаётган иқтисодий қийинчиликлар туфайли кўплаб туркманистонликлар чет элга ишлаш учун чиқиб кетмоқда. Мавжуд вазият сабабли Туркманистондан меҳнат миграцияси оқими ҳам ошиб бормоқда, деб ёзмоқда CA-news.

Сўнгги пайтларда Ўзбекистон ва Қозоғистонга меҳнат муҳожирлари сифатида чиқиб кетишга ҳаракат қилаётган Туркманистон фуқаролари ҳақида хабарлар пайдо бўлмоқда. Бунга, хусусан, Туркманистон ҳукумати Туркияга мигрантлар оқимини тўхтатиш бўйича чора-тадбирларни кучайтиргани ҳам сабаб бўлди. Ушбу давлат туркманистонликлар пул ишлаб топиш мақсадида борадиган асосий жой саналади.

Маҳаллий манбалар сўзига кўра, Ашхобод аэропорти орқали рейсларга киритилмаган меҳнат мигрантлари эндиликда Туркияга Ўзбекистон ёки Қозоғистон орқали жўнаб кетишга уринмоқда.

Аввалроқ, Ашхобод халқаро аэропортида Туркманистоннинг ўнлаб фуқаролари Истанбул ва Дубайга рейсларга қўйилмаётгани ҳақида бир неча марта хабар берилганди. Февраль ойида Туркманистондан Озарбойжонга меҳнат мигрантлари оқими ошгани ҳақида хабарлар тарқалганди.