Туркманистон Давлат миграция хизмати (ДМХ) электрон виза тизими ва чет эл фуқароларини онлайн рўйхатдан ўтказиш порталини ишга туширди. Бу ҳақда Turkmenistaninfo хабар берди.
Давлат миграция хизматида янги рақамли хизматлар тақдимоти бўлиб ўтди. Унда Туркманистонда аккредитациядан ўтган хорижий дипломатик ваколатхоналар раҳбарлари иштирок этди. Туркманистоннинг хориждаги элчилари тадбирга видеоалоқа орқали уланди.
Электрон виза тизими migration.gov.tm портали асосида ишлайди. Унинг ёрдамида хорижликлар мамлакатга кириш рухсатномасини олиш учун ҳужжатларни интернет орқали юбориши мумкин. Миграция хизматининг расмий портали идоранинг алоҳида рақамли хизмати сифатида фаолият юритади.
Бундан ташқари, хорижий фуқароларни онлайн рўйхатдан ўтказиш учун мўлжалланган rgstr.migration.gov.tm сайти ишга туширилди. У орқали сайёҳлар, тадбиркорлар ва дипломатлар миграция ҳисобига қўйиш учун ҳужжатларни топширишлари мумкин.
Расмийлар миграция тартиб-таомилларининг электрон форматга ўтказилиши ҳужжатларни расмийлаштириш муддатини қисқартириши ва қоғозбозлик ҳажмини камайтиришини таъкидламоқда.
Электрон виза ишга туширилгунга қадар Туркманистонга туристик саёҳат қилиш учун хорижликлар одатда қабул қилувчи томон ёки туроператор орқали олдиндан таклифнома олиши, сўнгра виза расмийлаштириши керак эди. 2025 йил апрель ойида «Миграция тўғрисида»ги қонунга электрон виза олиш учун таклифнома талаб қилинмайдиган ўзгартиришлар киритилди. Шу билан бирга, расмийлар ҳозирча янги тизимнинг ишлаш шартлари, жумладан, e-Visa нархи, кўриб чиқиш муддати ва зарур ҳужжатларнинг тўлиқ рўйхатини очиқ эълон қилгани йўқ.
