Шимолий Корея етакчиси Ким Чен Ин ва Корея Республикаси президенти Мун Чжэ Ин жума, 27 апрель куни, Тошкент вақти билан соат 5:30да демаркация чизиғида учрашади. Бу ҳақда Reuters хабар қилмоқда.
Хабар берилишича, мамлакатлар етакчиларининг қуролсизлантирилган ҳудуддаги учрашувидан сўнг, Жанубий Корея фахрий гвардияси сиёсатчиларга музокаралар ўтказиладиган жойга қадар ҳамроҳлик қилиб боради. Музокаралар эса Тошкент вақти билан соат 6:40да бошланади. Кутилишича, мамлакатлар етакчилари саммит якунлари бўйича қўшма ҳужжатни имзолайди.
РИА «Новости»нинг аниқлик киритишича, Ким Чен Инга унинг синглиси, 2015 йилдан бери Корея Меҳнат партияси Марказий қўмитаси тарғибот ва ташвиқот бўлими бошлиғи лавозимини эгаллаб келаётган Ким Ё Чен ҳамроҳлик қилади.
Эслатиб ўтамиз, аввалроқ КХДР етакчиси Ким Чен Ин Пхеньян ядро ва ракета синовларини тўхтатаётгани, шунингдек ядровий синов майдончасини ёпаётгани ҳақида маълум қилганди.
