Малайзия фуқаролик авиацияси раҳбари изсиз ғойиб бўлган Boeing ҳақидаги ҳисоботдан сўнг истеъфога чиқди

Малайзия фуқаролик авиацияси департаменти раҳбари Азҳаруддин Абд Раҳмон Ҳинд океани узра ғойиб бўлган Малайзиянинг Boeing-777 самолёти бўйича якуний ҳисобот эълон қилингач, истеъфога чиқиш ҳақида ариза берди. Бу ҳақда The Star газетаси сайтида хабар қилинган.

Раҳбар ўз истеъфосини тергов давомида назоратчилар ишида аниқланган бузилишлар билан боғлади, бироқ ҳужжатда у раҳбарлик қилаётган департаментга нисбатан бевосита айбловлар йўқ.

«Комиссия ҳисоботи фуқаролик авиацияси департаментига МН370 рейсининг ҳалокати учун масъулият юкламаслигига қарамай, ҳисоботда Куала-Лумпур аэропорти авиадиспетчерлик хизмати иши билан боғлиқ бир нечта аниқ хулоса бор. У ерда ҳаво ҳаракатини назорат қилишнинг стандарт жараёнлари диспетчерлар томонидан бузилгани ҳақида сўз юритилади», - дея маълум қилган Абд Раҳмон.

Таъкидланишича, у сешанба куни эрталаб истеъфога чиққан бўлиб, қарор 14 кундан кейин кучга киради.