Эктор Купер Ўзбекистон терма жамоаси йиғинини 22 августда бошлайди

Фото: Tribuna.Uz

Ўзбекистон миллий терма жамоасига бош мураббий сифатида тайинланган аргентиналик мутахассис Эктор Купер дастлабки ишни футболчиларни кўздан кечиришдан бошлайди.

Шу мақсадда, 22 августдан 1 сентябрга қадар Тошкентда терма жамоа ўқув машғулот йиғини ташкил қилинади. Унда асосан миллий чемпионатимизда тўп сураётган футболчилар кўздан кечирилса, сентябрга яқин хорижда тўп сураётган легионер футболчилар ҳам йиғинга келиб қўшилади.

Терма жамоага номзод футболчиларни кўздан кечириш ва Ўзбекистон миллий терма жамоаси асосини шакллантириш учун Эктор Купер ва унинг ёрдамчилари режа асосида иш олиб боришади.

Шунингдек, Ўзбекистон терма жамоаси Сурия, КХДР ва Қатар каби терма жамоалар билан ўртоқлик ўйинлари ўтказади. Улар орқали Купер ва унинг ёрдамчилари Ўзбекистон терма жамоасининг асосий таркибини шакллантириб боришади.