Проф рингдаги бешта жангдан сўнг: Шаҳрам Ғиёсов дастлабки тажриба ва хулосалар ҳақида

4-5 йил олдинги Шаҳрам қандай бўлса, Америкадаги ҳозирги Шаҳрам ҳам шундай: у ўз устида ишлайди, уни ҳеч ким танимайди; у эса ҳамма таниши учун, Ўзбекистонимиз байроғини танитиш учун меҳнат қилади. Бу ерда мен дам оламан, кўпчиликнинг кўз остида бўламан. У ерда эса фақат ўз устида меҳнат, азоб чекасиз, ҳеч кимни танимайсиз. Меҳнат қилмайсизми, демак рингга чиққач, ютқазасиз.

Ўйлайманки, ким бўлишимиздан қатъи назар, ҳар доим инсон бўлиб қолсак, спортчи сифатида ўз устимизда ишласак, ҳеч қачон кам бўлмаймиз. Қандай бўлган бўлсам, ҳозир ҳам шундайман.

- Профессионал боксдаги машғулотлар анча қийинлигини айтдингиз. Мураббийларнинг талаби анчагина фарқ қилар экан-да?

- Профессионал боксда машғулотлар жуда қийин. Талаб жуда ҳам юқори. Негаки, энг кам раундимиз – 6 раунд. Охирги иккита жангим 8 раунддан бўлди. Бу ерда (Ўзбекистонда – таҳр.) машғулотларимиз 2 маҳал – эрталаб 1 соат, кечаси 2 соат эди. Кунора, бир кун бир маҳал эди. У ёқда эса ҳар куни икки маҳал 2, 3, 4 соатдан машғулотда бўламиз. Дам олиш куни фақат якшанба. Дам олишга, ўзни бемалол сезишга вақт йўқ. Фақат меҳнат. Эрталаб 5:30 да, туш вақтидаги машғулот соат 13 да. Кечаси учинчи тренировка ҳам бўлиши мумкин, у – тикланишга ёрдам берувчи машғулот бўлади, унда баскетбол, теннис, футбол, сузиш билан шуғулланишимиз мумкин.

Фарқи мана шунда – машғулотлар ҳаваскор боксдан 2-3 баробар қийинроқ. 

- Профессионал боксда рақиб танлаш жараёни қандай бўлади?

- Рейтинг жанглари ўзаро келишган ҳолда ташкил этилади. У сизга таклиф билан чиқиши ҳам мумкин ёки бунинг акси. Ҳозир мен рейтингда биринчи ўринда турган боксчига таклиф юбора олмайман, чунки менда ҳали бунга рухсат йўқ. Рейтингим ҳали у қадар юқори эмас. Лекин узоғи 3-4 та жангдан кейин истаган рақибга чақирув юборишим мумкин бўлади.

Спортчи профессионал боксга кирганида истаса-истамаса энг охирги – мингинчи ўринда бўлади. Сизнинг вазн тоифангизда минг нафар спортчи бор. Мен бешта жангимдан сўнг кучли 50-70 таликка орасига кирганман. Яна 3-4 та жангимдан кейин энг биринчи ўриндагиларга ҳам таклиф юборишим мумкин. Ҳозирнинг ўзида 2-3 нафар спортчига чақирув юбориб кўрдим, аммо улар ҳозирча таклифимни қабул қилишмаяпти. Агар шундай натижалар қайд этишда давом этсам, Худо менга куч-қувват бериб турса, мен таклиф юборганимда улар қабул қилишмаса, бу ўзлари учун минус бўлади.

Ҳали яхши спорт формасига чиқа олганим йўқ, деб ҳисоблайман. Яна меҳнат қилиш керак. Мен 40-50 ўринлар учун Америкага борганим йўқ. У ерда фақат биринчи бўлиш учун борганман.

Биринчи жангимда тўрт нафар рақибдан рад жавоби олгандим. Улар олдин: «Бўлди, биз жангга тайёрмиз», дейишади. Менежерим менинг исмимни айтганидан кейин, интернетдан жангларимни, кимлигимни кўриб, икки кундан кейин: «Йўқ, биз тайёр эмасмиз, жанг қилмаймиз», деб жавоб ёзишади.

Муроджон Аҳмадалиев билан ҳам шундай вазиятлар кўп бўлди. Бизнинг ҳаваскор боксдаги ютуқларимизни кўриб, рад жавобини бериб юборишади. Айрим спортчилар эса аксинча, яхши рақиб билан жанг қилишни яхши кўришади. Масалан, охирги рақибим – никарагуалик Лагуна. У 14 та жангда 14 та ғалабага эришган. Биз у қабул қилмаса керак, деб ўйлаб таклиф юбориб кўргандик. Аммо биз розимиз, деган жавобни олдик.

Боксга мана шундай мард спортчилар керак. Мағлуб бўлишдан қўрқадиганлар ҳам бор. Ким мағлуб бўлишдан қўрқса, у буюк натижага эриша олмайди, деб ўйлайман. Спортчи ҳамма вақт ўзини синаб кўриши керак.

Маълумот учун, Шаҳрам Ғиёсов 1993 йилнинг 7 июль куни Бухорода туғилган. Ҳаваскор боксда жаҳон чемпиони (2017), Олимпия ўйинлари совриндори (2016), Осиё чемпиони (2017). 2015 йил Якутскда бўлиб ўтган ёшлар ўртасидаги жаҳон чемпионатида олтин медални қўлга киритган. У 2018 йил март ойида профессионал рингдаги илк жангини ўтказиб, 1-раунднинг 7-сониясидаёқ рақибини полга қулатган эди.