Покистон шимоли-ғарбидаги Дера-Исмоил-Хон шаҳрида портлаш содир этилиши оқибатида 10дан ортиқ инсон ҳалок бўлди ва 35 киши жароҳатланди. Бу ҳақда Reuters хабар берди. Портлаш полиция назорат-ўтказиш пунктида юз берган.
Dawn нашрининг аниқлик киритишича, портлашни назорат-ўтказиш пунктига портловчи ускуна ўрнатилган тракторда келиб урилган ҳудкуш террорчи амалга оширган.
Портлаш оқибатида тўққиз нафар эркак, икки нафар аёл ва бир нафар бола ҳалок бўлган. Пунктнинг катта қисми шикастланган ва унинг ёнидаги бино бутунлай вайрон бўлган.
Покистон президенти Асиф Али Зардорий террорчилик ҳужумида «Фитна ал-Ҳиндустан» ва «Фитна ал-Ҳавариж»ни айблади.
Булар Покистон ҳукумати Белужистон ҳудудида фаолият юритадиган барча айирмачи ва исёнчи гуруҳларнинг шартли номларидир.
