Ўба қишлоғи аҳолиси куз-қиш мавсумида газсиз қийналмоқда. Бухоро тумани ҳокимлиги мутасаддилари муаммони ҳал этадими?

«Kun.uz» сайтига Бухоро вилояти, Бухоро тумани, «Кунжи-қаъла» маҳалласининг Ўба қишлоғи аҳолисидан мурожаат келиб тушди. Унда қишлоқ аҳолиси газ ва электр энергияси таъминотидаги муаммолар, куз-қиш мавсумидаги қийинчиликлар ҳақида баён этиб, ушбу муаммоларни ҳал этишда ёрдам сўраган.

Мазкур мурожаатни жойида ўрганиш учун қишлоққа йўл олдик. Бизни қишлоқ одамлари кутиб олишди.

Маълум бўлишича, қишлоқда газ тармоғи бор. Фақат 2013 йилда тармоқдан узиб қўйилган.

Электр энергияси таъминотида мунтазам узилишлар мавжуд. Қолаверса, қишлоқдаги трансформаторда уланишлар меъёрдан ошиб кетган. Бу эса куз-қиш мавсумида бир қатор муаммоларни келтириб чиқармоқда.

Қишлоқ аҳлининг дардига қулоқ тутдик.

«Қишлоғимизда газ 2013 йилда узиб қўйилган. Қишлоқ аҳолиси суюлтирилган газ баллони билан таъминланган. Аммо уни қиш кунлари уйларни истиш учун ишлатиб бўлмайди. Фақат ошхонада туради. Уйни иситиш учун ўтин ва кўмир ишлатишга мажбурмиз. Уларни ҳам топиш амримаҳол. Ахир, беморлар, ногиронлар ва ёш болалар бор», – дейди Латофат Нутфиева.

«Қишлоғимизга газ қайта уланишини хоҳлаймиз. Ўғлим, келиним ва неваралар, бутун оиламиз битта хонада туришга мажбурмиз. Газ ва электр энергияси таъминотидаги муаммолар туфайли уйларни иситиш учун ҳовлимиздаги мевали дарахтларни ҳам кесиб, ёқиб тугатдик. Қўшни қишлоқда газ бор, аммо бизда йўқ. Бизларга қийин. Мисол учун, қўшним ногирон, жуда ҳам қийналади совуқ кунларда. Кўмир ҳам йўқ», – дейди Шоҳида Раҳмонова.

«Уйимизда учта оила яшаймиз. Икки нафар келиним бор. Газ йўқлиги учун қишда электр печлардан фойдаланамиз. Аммо электр энергияси ҳам тез-тез ўчаётгани туфайли бунинг ҳам иложини қилолмаяпмиз. Бугуннинг ўзида ҳам бир неча марта ток ўчди», – дейди Фароғат Амонова.

Аҳолининг эътирозларини тинглагач, ушбу маҳалла раиси Фурқат Ниёзов билан суҳбатлашдик.

«Қишлоқ аҳолисининг эътирозлари тўғри. Ҳақиқатан ҳам 2013 йилда газ тармоқдан узилган. Бунга тегишли идора мутасаддилари чекка қишлоққа табиий газ етказиб беролмаслигини важ қилиб кўрсатган. Аммо суюлтирилган газ баллони тўлиқ етказиб берилмоқда. Газ тармоқдан узилишида одамларнинг ҳам айби бор. Ўша вақтлар газ тармоғига ноқонуний уланишлар, ҳар хил газ сўрувчи жиҳозлар ўрнатиш авж олди. Бундай ҳолатлар фожиа билан тугаган вақтлар ҳам бўлди. Шу сабаблар ва газ босими паст бўлгани учун қишлоқ газ тармоғидан узилди. Кўмир масаласига келсак, фуқароларга эҳтиёжига қараб, чекланмаган миқдорда тарқатилади», – дейди Кунжи-қаъла маҳалласи раиси Фурқат Ниёзов.

Қишлоқ аҳолиси кўмирнинг сифати талаб даражасида эмаслигини билдирди. Маҳалла раиси ҳақиқатан ҳам кўмирнинг сифати пастлигини тасдиқлади.

Кўмир харид қилган хонадондаги фуқаро билан шу ҳақида суҳбатлашдик.

«Кўмирни сифати паст бўлса ҳам сотиб олишга мажбурмиз. Газ йўқ, ток мунтазам ўчади. Кўмирнинг 50 фоизигина ёқишга ярайди. Қолганини ишлатиб бўлмайди», – дейди Меҳриноз Ёшиева.

Қишлоқдаги муаммоларни ўрганиб, ушбу ҳолатларга туман мутасаддиларидан изоҳ олиш учун Бухоро тумани ҳокимлигига йўл олдик. Аммо туман ҳокимлигидан бирор мутасаддини топа олмадик. Қоровул бу ҳолатни якшанба куни, деб изоҳлаган бўлса, ўзини Мажид деб таништирган ҳокимият навбатчиси ҳамма пахтадалигини билдирди. Шу куни туман мутасаддилари телефон рақамларига боғланиш учун қилган уринишларимиз зое кетди.

Кейинчалик туман ҳокимининг ушбу масалаларга масъул бўлган ўринбосари Зокир Тоҳиров билан боғландик.

«Қишлоқнинг газ тармоғи тегишли чора-тадбирлар асосида узиб қўйилган. Электр энергиясига эса вилоятдан чекловлар берилган. Шунинг учун электр энергиясида узилишлар бўляпти. Бу вилоятдан келган топшириқ. Қишлоққа суюлтирилган газ баллонлари етказиб бериляпти. Кўмир сифатига келсак, бу учун биз жавоб бермаймиз. Келганини тарқатамиз», – дейди З.Тоҳиров.

Электр энергияси таъминотидаги муаммолар юзасидан туман «Электр энергияси» корхонаси раҳбари Комил Қорёғдиевдан изоҳ сўрадик.

«Куз-қиш мавсумида электр энергияси истеъмоли тўрт баравар ошиб кетди. Шу туфайли электр энергия танқислиги юзага келган. Шунинг учун бу борада чекловлар бўляпти. Қишлоқдаги трансформаторга келсак, ҳақиқатан ҳам тўғри, уланишлар белгиланган меъёрдан ошиб кетган. Қишлоққа яна бир трансформатор ўрнатишни режалаштиряпмиз. Ўн беш кунда бу муаммони ҳал қиламиз», – дейди К.Қорёғдиев.

Қишлоқнинг газ тармоғидан узиб қўйилиши юзасидан «Ўзтрансгаз» Бухоро вилояти ҳудудий газ таъминоти филиали бошлиғи Ўктам Абдиев изоҳ берди.

«Бу қишлоқ ўрганишлар натижасида газ етиб бормайдиган қишлоқлар қаторига киритилган. Вазирлар Маҳкамаси, вилоят ва туман ҳокимларининг тегишли қарорлари асосида қишлоқ газ тармоғидан 2013 йилда узилган. Газ тармоғига қайта улашнинг имкони йўқ. Қишлоқ аҳолисига имтиёзли нархда суюлтирилган газ баллонлари мунтазам етказилиб турилибди», – дейди у.

Ўрганишлар давомида қишлоқ одамларининг эътирозлари ва мутасаддиларнинг изоҳи шундай бўлди.

Қишлоқ аҳолиси куз-қиш мавсумида қийналаётгани бор гап. Етказиб берилаётган кўмир эса сифатсиз, ўтин йўқ. Муаммо бор, унинг ечими эса мутасаддиларнинг зиммасида. Ҳаммаси тегишли тартибда қилинган, қабилидаги сўзлар билан қишлоқдаги хонадонлар исиб қолмайди. Бу борада зарур чораларни кўриш лозим. Албатта мутасаддилар ушбу муаммоларга эътибор қаратишига умид билдирамиз.

Бардошбек САМАД ўғли,
Kun.uz мухбири