«Бир кунда 600 минг доллардан ортиқ маблағ йўқотдим». Тошкентда тадбиркор қураётган уйлар бузиб ташланди
|23:23 / 23.11.2018148 4538 мин
Яқинда ижтимоий тармоқларда ёш тадбиркорнинг президент ва халққа мурожаати йўлланган видеотасвир тарқалганди. Унда жорий йилнинг 4 ноябрь куни тадбиркор Муҳаммадбобур Хўжаев томонидан Тошкент шаҳри Мирзо Улуғбек тумани «Авайхон» маҳалласи ҳудудида қурилаётган 3 қаватли турар-жой биноси шаҳар ҳокими Жаҳонгир Ортиқхўжаев назоратида бузиб ташлангани айтилганди. Мазкур ҳолат юзасидан KUN.UZ таҳририяти журналистлик суриштирув ўтказди.
Youtube'да кўриш
Mover'да кўриш
Ҳудудга бориб, бузилаётган бинони кўздан кечирдик. Бу вақтда ҳудуд деярли теп-текис эди. Бироқ тозалаш ишлари авжида экан. Аввалига ўша ердаги бузиш ишларига масъул бўлган мансабдор шахслардан бири, Тошкент шаҳар ИИББ Ёнғин Хавфсизлиги Бош бошқармаси бошлиғи ўринбосари Бахтиёр Пўлатовга юзландик.
«Мазкур бино ёнғин хавфсизлиги қоидаларига зид равишда қурилаётган бўлган. Уйлар орасидаги масофа талабга кўра 6 метрни ташкил этиши керак. Лекин талаблар бажарилмаган. Мабодо фавқулодда ҳолатлар бўлиб, фуқаролар ва уларнинг буюмлари эвакуация қилиниши керак бўлса, бу ерга бирорта техника кира олмайди. Бу ўз навбатида катта зарар олиб келиши мумкин.
Уйларнинг ичидаги ҳаво айланишига хизмат қилувчи трубалар ҳам режада кўрсатилганидек эмас. Бундан ташқари, 1900 метр квадрат майдонга уй солиши кўрсатилган. Лекин тадбиркор қўшимчасига 600 метр квадрат майдонга ноқонуний қурилма қилган.
Лойиҳалаштирувчи ташкилот ҳужжатларда хусусий уй сифатида расмийлаштирилгани сабаб бинони қабул қилиш жараёнида давлат қабул комиссияси қатнашмаган. Фақатгина харидор билан шартнома қилиниб ҳужжат тегишли ташкилотлардан расмийлаштирилган», - дейди Бахтиёр Пўлатов.
Бахтиёр Пўлатов
Шундан кейин Тошкент шаҳар фавқулодда вазиятлар бошқармаси ходими Элбек Қўчқоров билан ҳам суҳбатлашдик.
Мавзуга оид
«Хабарингиз бўлса, Тошкент шаҳрида яқинда 7 киши ис газидан вафот этди. Ушбу ҳолат юзасидан комиссия тузилиб, текшириш ишлари олиб борилди. Хулосага кўра, ушбу фирма томонидан қурилган ва қурилаётган бинолар белгиланган қурилиш стандартларига жавоб бермайди. Газ ускуналари нотўғри қўйилган, газ трубалари ҳужжатларда кўрсатилган талабларга жавоб бермайди.
Камига хусусий уй қураман деб олинган майдонга кўп қаватли сотиладиган уйлар қурилган», - деди бошқарма ходими.
Маҳалла фаолларидан бири бўлган Гулчеҳра Назармуҳаммедова ушбу ҳолатни оддий фуқаро сифатида 100 фоиз қўллаб-қувватлашини билдирди. Яқин атрофда яшовчи инсонлар ҳам бу ҳолатга ижобий фикр билдиришди.
Гулчеҳра Назармуҳаммедова
Кейин Мирзо Улуғбек туман бош архитекторига юзландик. Унинг айтишича, ҳужжатларга кўра якка тартибдаги тураржой қурилиши керак бўлган. Уйлар кўп қаватли тураржой сифатида қурилган. Бу ҳолатни ўша вақтда аниқладик. Туман ҳокимига далолатнома тузиб киритилган. Тегишли ҳужжатлар суд органига берилган. Ҳозирда жараёнлар давом этмоқда.
«Бузиб ташланган бинолар шаҳарсозлик норма-қоидаларига жавоб бермайди. Бинолар тасдиқланган лойиҳа асосида қурилганида эди, ҳозирги салбий оқибатлар юзага келмасди. Уйлар орасидаги масофалар ҳам ҳисобга олинмаган», - деб вазиятни тушунтирди бош архитектор Муродил Жамолов.
Шундан сўнг, Мирзо Улуғбек тумани кадастр бўлими бошлиғи Гавҳар Мансурова бу борада ўз фикрларини билдирди.
Гавҳар Мансурова
«Ҳужжатларда ушбу мулк кўп қаватли уй деб белгиланган. Объектни шартнома асосида бошқа шахсларга бир қисмини нотариус орқали мулк қилиб сотиши мумкин. Олди-сотди шартномаси асосида. Ҳар бир хонадоннинг кадастр ҳужжатлари жойида. Қонунан амалга оширилган. Бошқа ҳолатларга мен жавоб бермайман», - деди Гавҳар Мансурова.
Тегишли ташкилотлар вакилларидан изоҳ олгач, бинолари бузиб ташланган тадбиркор Муҳаммадбобур Хўжаев билан суҳбат олиб бордик. Иккинчи тараф сифатида тадбиркор ўз фикрларини билдириб ўтди.
«Лойиҳани кўздан кечирадиган бўлсак, бошида Мирзо Улуғбек туман бош архитектори М.Жамолов қўл қўйиб тасдиқлаганди. Кейин шаҳар ҳокими келиб «лойиҳадаги марказда кўрсатилган йўлакни очиб, хавфсизлик техникаси қоидаларига жавоб берадиган қилиб қуринглар, мен тадбиркорлар томондаман», деб кўрсатма бериб кетди. Биз топшириқни бажаришга киришдик. Эрталабгача улгурмадик. Эртасига ҳоким бош вазиримиз билан келди ва қурилаётган биноларимиз оғзаки топшириқ билан бузиб ташланди.
Фуқаролик кодексига кўра, «Ўзбошимчалик билан иморат қуриш натижасида ҳуқуқлари бузилган шахснинг ёки тегишли давлат органининг даъвоси билан бундай иморат суднинг қарорига биноан иморатни қурган шахс томонидан ёки унинг ҳисобидан бузиб ташланиши лозим» дейилган.
Нега мен қураётган бинолар суднинг қарорисиз бузиб ташланди? Мен тушунмадим. Шу вақтгача бирорта давлат ташкилотларидан келиб сизларда шундай камчиликлар бўляпти деб тушунтириш ҳам бермаган.
Биз қурадиган бинолар бошқа уйлар нархидан кескин фарқ қилади. 1 хонали уйимизнинг нархи 110-115 миллион сўмга боради. Бошқа қурилаётган уйларнинг нархидан хабарингиз бор. 3-4 хонали уйлар нархи деярли миллиард сўмга баҳоланмоқда. Тошкентда ойликка яшайдиган оилалар бундай уйлардан умуман сотиб ололмайди. Тошкентда 3 миллион ойлик олиб ишлайдиган инсон бизнинг уйлардан бемалол кредитга олиб яшаса бўлади. Ҳамма шароити бор. Тошкентда уйлар фақат бойлар учун қурилмаслиги керак. Ўртаҳол оила кўпчиликни ташкил қилади. Биз шундай тоифа оилалар учун уй қуриб келаётган эдик.
Бир-иккита хатоларимиз бор. Иш бор жойда камчилик бўлади. Шуни тушунтирса биз тўғрилаймиз. Давлат ёш тадбиркорга ёрдам бериши керак эмасми?! Бир неча бор ҳокимият ва ички ишлар вакиллари топширган топшириқларни ҳам ўз вақтида бажардик. Имкон берса буни ҳам тўғрилар эдик.
Энди бузиб ташлашга асос сифатида яқинда Тошкент шаҳрида ис газидан вафот этганларни кўрсатишмоқда. Ўша уйнинг мулкдорлари биз қўйган ҳаво айланишига хизмат қилувчи трубаларни тегишли ташкилотдан рухсат сўрамай бошқасига алиштирган. У эриган ва ичи ёпилган. Газ ҳиди унча билинмаганига сабаб, ичкарида тўпланиб қолган. Натижада уйдагилар ундан заҳарланиб вафот этишган.
«Энди сенга бир ҳафта муддат. Қурган уйларингда яшовчиларга пулини бер ва уйларни бўшат. Бузамиз» дейишмоқда. Мингга яқин инсонни қаерга кўчираман? Уларга маблағни қаердан оламан? 600 минг доллардан ортиқ маблағим йўқ бўлиб кетди. Додимни кимга айтай?
Мен очиқ айтаман, қураётган уйларимдан 1 баробар миқдорда фойда қиламан. Уни кейин фирма раҳбарлари билан бўлишаман. 3-4 баробар фойда олмаганман. Ният ҳам қилмайман. Оз бўлса ҳам баракасини берсин деганман.
Фикримча, бош вазирга ҳам, шаҳар ҳокимига ҳам қўл остидагилар томонидан маълумотлар нотўғри етказилган. Улар аслида яхши инсон. Доим қўллаб келишган.
Умид қиламанки, масалага тез орада ойдинлик киритилади. Президент Шавкат Миромонович Мирзиёевдан ҳам ёрдам сўрайман. Илтимос менга ёрдам беринг! Мен 28 ёшли тадбиркор пулсиз қолдим. Нима қилишга ҳам ҳайронман. Менга имкон берилса, албатта давлатга бундан ҳам катта фойдали ишлар қилиш қўлимдан келади. Чет элдан инвесторларни ҳам жалб қила оламан», - дея бўлиб ўтган воқеаларни айтиб берди тадбиркор.
Хабарларга кўра, 28 яшар тадбиркорнинг яқинда бузиб юборилган иморати қурилишида «прораб» бўлиб ишлайдиган Аброр Сайфуддинов ва Шуҳрат Аҳмедов Мирзо Улуғбек туман ИИБ вақтинчалик тергов изоляторида 13 ноябрь куни 1 кун ушлаб турилган ва қўйиб юборилган. Асос сифатида қандай сабаб кўрсатилган ҳозирча номаълум.
KUN.UZ воқеалар ривожини кузатишда давом этади.
Зафарбек Солижонов махсус мухбир,
Шерзод Эгамбердиев оператор
