Либертадорес кубоги финали учрашуви тартибсизликлар сабабли бир кун кейинга кўчирилди

Либертадорес кубоги финалининг Аргентинанинг “Ривер Плейт” ва “Бока Хуниорс” клублари ўртасидаги жавоб учрашуви мухлислар уюштирган тартибсизликлар сабабли 25 ноябрга кўчирилди. Бу ҳақда КОНМЕБОЛ маълум қилди.  

Учрашув “Ривер Плейт”нинг Буэнос-Айресдаги стадионида 24 ноябрда ўтиши керак эди. У “Бока” ўйинчилари автобусига мухлислар томонидан ҳужум қилингани сабабли икки марта бир соатга кечиктирилган.

Автобусга “Монументаль” стадионига йўл олиши вақтида турли буюмлар улоқтирилган. Полиция мухлисларни тарқатиш учун резина ўқлар, кўзни ачиштирувчи газ ва сувотгичлар қўллаган.

Футболчиларнинг таъкидлашича, автобусга тутун шашкаси тушиши оқибатида кўплаб ўйинчилар ис газидан заҳарланишган. Бир неча футболчи кесик жароҳатлари олган. Воқеадан кейин кўзидан жароҳат олган “Бока” сардори Пабло Перес, ярим ҳимоячи Гонсало Ламардо ва ҳужумчи Карлос Тевес шифохонага етказилганлар, бироқ кўп ўтмай стадионга қайтганлар.

“Бока” раҳбарияти ўйинчилар жароҳат олгани сабабли ўйиннинг кейинга кунга кўчирилишини талаб қилган. “Ривер Плейт” мураббийи Марсело Гальярдо рақиб жамоа стадионга чиқишдан бош тортса, буни қўллаб-қувватлашини айтган. Тевес майдонга қайтгач, жамоа ўйнай олмаслигини айтган. КОНМЕБОЛ раҳбари Алехандро Домингес ва ФИФА президенти Жанни Инфантино эса ўйиннинг кўчирилишига қарши чиқишган.

LAMENTABLE#AbstractoNL Así fue la agresión al camión de Boca Juniors en su camino al Monumental #BocaxFOX #RiverxFOX #RiverBoca pic.twitter.com/Rv0eyvo03p

— Abstracto Noticias (@AbstractoNL) 24 ноября 2018 г.

11 ноябрда ўтган биринчи учрашув 2:2 ҳисобида якунланганди. Ўшанда ҳам ўйин ёмғир сабабли бир кунга қолдирилганди.

Либертадорес кубоги 1960 йилдан бери ўтказиб келинади ва Жанубий Американинг энг нуфузли клублараро мусобақаси ҳисобланади. Мусобақа тарихида Буэнос-Айреснинг “Бока” ва “Ривер” жамоалари илк бор финалда тўқнаш келдилар.

Бу икки клуб қарама-қаршилиги жаҳон футболидаги энг муросасизларидан бири ҳисобланади. Айни вақтда “Ривер” Аргентинанинг энг унвондор клуби ҳисобланиб, мамлакат чемпионатини 36 марта, Либертадорес кубогини 3 марта ютган. “Бока” эса мамлакат чемпионатида 33 марта ютган, бироқ Либертадорес кубогида 6 марта зафар қучган.

2015 йилда мусобақанинг ушбу икки клуб тўқнаш келган чоракфинал учрашувида 2-бўлим бошланиши олдидан “Бока” мухлисларидан бири “Ривер”нинг майдонга чиқаётган ўйинчиларидан бирига гармдори баллончасини улоқтирган. Бунинг оқибатида 4 футболчи жиддий жароҳат олган. Натижада учрашув тўхтатилиб, “Бока”га техник мағлубият берилган ва жамоа мусобақани тарк этишига тўғри келган. Бу ўйин икки жамоанинг тартибсизликлар сабабли охиригача ўйналмай қолган ягона ўйин ҳисобланади.