Аламли хато, африкалик шаманлар ва Арвеладзенинг ёш футболчилардан эътирози ҳақида. Тошкентлик Питер Одемвингие билан суҳбат
|16:10 / 21.02.201916 7579 мин
Ўзбекистонлик футбол мухлислари ҳеч бўлмаса бир футболчимиз Англия Премьер-Лигасида ўйнасайди деб орзу қилишади. Лекин ўзбекистонлик футболчилардан бири Англияда ўйнаган десак хато бўлмайди. Ўзбек футболига бефарқ бўлмаганлар Питер Одемвингиени ўзимизнинг футболчи деб билишади. Питер Тошкент шаҳрида нигериялик шифокорлар оиласида туғилган.
Тошкент ўзи учун қадрли эканини кўп бора таъкидлаган Питерни Россияда ҳам яхши кўришади. Кейинчалик Нигерия терма жамоаси ва Англия Премьер-Лигаси юлдузига айланган Одемвинге Тошкентда русча гаплашиб улғайгани сабаб Россия чемпионатига тез мослашиб кетади. Унинг онаси ҳамон Москвада яшайди.
Питер яқинда Тошкентга келгани ёдингизда. Унинг «Бунёдкор» сафида пайдо бўлиши мумкинлиги хақида хабарлар ҳам пайдо бўлди. Питернинг Тошкентдан кейинги манзили Москва бўлди. Бу имкониятдан фойдаланган Championat.com сайти Одемвингиедан интервью олди.
Интервью давомида нигериялик футболчи «Пахтакор» бош мураббийи Шота Арвеладзе билан ёш футболчилар ҳақида гаплашганини ҳикоя қилди. Рус тилини яхши биладиган Питер кўплаб мавзуларда мулоҳазаларини билдирган. Қуйида суҳбатнинг қизиқарли қисмларини келтирамиз.
– Бу ерларни унча яхши билмайман. Миша Моссаковский (Матч ТВ шарҳловчиси) ёрдамида топиб келдим. Менинг Москвадаги гид-дўстим айнан Миша (кулади).
– Кўрдингизми, улар мени кўргач хурсанд бўлишди (кулади). Сичёв (Дмитрий Сичёв), Динияр (Билялетдинов), Самедов (Александр Самедов). Ажойиб хотиралар ёдга тушди.
– «Локомотив»нинг қайси мураббийи билан ишлаш сизга маъқул келган?
– Барча мураббийлар билан яхши чиқишганман, чунки доим майдонга тушганман. Бир марта Юрий Палич (Юрий Павлович Сёмин) кимнингдир гапига қулоқ солиб мени захирада қолдирган ва бу орқали мендаги «оловни аланга олдирмоқчи бўлган». Ўша вақтлар бир нечта ўйинда гол ура олмаётгандим.
– Сёминнинг энг эсда қоларли кўрсатмаси?
– Ғалаба қозонишимиз шарт бўлса, у бир гапни айтарди: «Агар майдонда ўтни ейиш керак бўлса, енглар».
– Бир вақтлар ўзингизни «Локомотив»нинг энг яхши футболчиси деб айтгандингиз, ҳозир ҳам шундай ўйлайсизми?
Мавзуга оид
– Ха-ха-ха, бу қизиқ воқеа бўлганди. Журналист менга «Сен энг зўрсан, шунчаки суперсан», деди. Ахир мен у билан баҳслашиб кетмайман-ку (кулади). Сарлавҳаларда эса бу гапларни менинг тилимдан чиқариб юборишди. Мураббий интервьюни ўқигач олдига чақирди ва «Нималар қилиб юрибсан?», деди. Ўша интервьюдан кейин икки ҳафтача менга қовоқ ўйиб юришди (кулади). Лекин жиддий муаммо бўлгани йўқ. Биласизми, натижалар яхши бўлса, ҳеч ким бундай нарсаларга эътибор бермайди. Лекин натижалар салбий бўлса, барча ёмон нарсаларни ковлай бошлайди. Масалан, Стивен Жеррард клубининг афсонасига айланган, лекин кўпчилик у биргина вазиятда йиқилгани ва шу сабаб жамоаси совриндан маҳрум бўлганини эслайди.
– Сизда ҳам шундай аламли хато бўлганми?
– Ҳа, «МЮ» дарвозасига пенальтидан гол ура олмаганман. Айтарли ёмон воқеа бўлмаган лекин шеригимнинг «Ўзим тепсам бўларкан» деган гапи алам қилганди.
– Россия чемпионатидан Англияга қандай бориб қолдингиз?
– «Вест Бром» спорт директорининг укаси Нигерияда ишлаган. У Нигерия терма жамоасининг ўйинларини кузатган ва мени акасига тавсия қилган. Ўша вақт «Локо»да раҳбарият ўзгарган ва менинг бир йиллик шартномам қолганди. Клуб менинг трансферимдан фойда қилиб қолиш имконини қўлдан чиқармади. Умуман, шу ва ҳаётимдаги бошқа воқеалар ҳақида автобиография ёзишни ният қилганман.
– У қайси тилда бўлади?
– Қайси тилда бўлиши муҳим эмас, чунки бугун китобларни таржима қилдириш муаммо эмас. Лекин китобни рус тилини биладиган одам ёзишини хоҳлардим. Агар бу одам Англияда яшаса яна ҳам яхшироқ бўларди (кулади).
– Динияр Билялетдинов тўғри келадими?
– Во, чиндан ҳам яхши вариант. Лекин унинг отаси билан бўлган зиддиятимиз бунга таъсир қилиши мумкин деб ўйлайман. Бу ҳақда эшитган бўлсангиз керак.
– Ҳа. Ўзи нима бўлган эди ўшанда?
– Грецияга ўйинга бордик. Асосий таркибда ҳали майдонга тушмаган ёшларни кўриб, жиғибийрон бўлдим. Бу ҳолат мени худди қизил байроқни кўрган буқага айлантирди ва катта Билялетдиновнинг олдига мураббийга ҳеч бўлмаса Эрик Карчагинни тушириши кераклигини, у ўзини кўрсатаётганини айтдим.
– Кейинчалик ўша вазиятда хато қилганингизни тан олгандингиз, тўғрими?
– Ҳа. Чунки профессионал сифатида ҳиссиётларимни жиловлашим керак эди. Агар бир кун келиб бу ҳақда ўғлимга ҳикоя қилиб берсам, унга отаси ноҳақ бўлганини айтаман.
– Нима деб ўйлайсиз, ёш футболчиларга мақсадига етишиш учун нима халақит беради?
– Октябрда Шота Арвеладзе билан гаплашиб қолдим. Билсангиз керак, у ҳозир «Пахтакор» бош мураббийи. У қизиқ гапни айтиб берди: «Ёш футболчилардан «Ҳаётда нимани хоҳлайсан», деб сўрасам, «Машина», деб айтишади». Мен масалан ёш вақтимизда нимани орзу қиласан дейишса, «Милан»да ўйнашни», деб жавоб берардим. Бугун ёшлар учун уй, квартира ҳаётдаги энг асосий натижага айланган. Масалан зўр машина сотиб олиш Чемпионлар Лигасини ютиб олишдек ёқимли эмас. Шукрки, мен бу борада анча намунали бўлганман (кулади).
– Африка клубларида шаманлар шифокорлардан ҳам муҳимроқ экани ростми?
– Жа унчалик эмас, лекин 70 фоиз футболчилар шаманларга ишонишади ва шаманлар берадиган дамламалар уларни асрайди деб ўйлайдилар.
– Россияга онангизни кўриш учун келдингизми?
– Ҳа шундай. Бундан ташқари Алексей Смертин мени ўзи ташкил қилган лойиҳасига ҳам чақирган. Биз мактабларга борамиз, болалар орасида спортни ва тенгликни тарғиб қиламиз.
– Бугун Смертин билан биргаликда ирқчилик, нотенгликка қарши курашяпсиз. Ўзингиз ҳам бир вақтлар ирқчиликдан жабрлангандингиз. «Локомотив»дан кетаётганингизда мухлислар баннер кўтариб «Вест Бром», сенга раҳмат», деб ёзиб, ёнига бананнинг расмини қўйишганди. Бу сизга қандай таъсир қилган?
– Тўғрисини айтаман, жуда хафа бўлганман. Лекин тушкунликка тушиб қолгандим десам, хато бўлади. Ахир мен АПЛга кетаётган эдим ва бу хурсандчиликни ҳеч нарса буза олмасди.
– 2017 йил қандай қилиб Индонезияга бориб қолдингиз?
– Ўзим ҳам билмайман (кулади). Баъзан хотинимга ҳазил қилиб, «Ҳаммасига сен айбдорсан, ахир у ерга борайлик деб сен айтгандинг», дейман (кулади). Хуллас, мен жароҳат олдим ва уни тиклаганимча Европада трансфер ойнаси ёпилди. Кейин Индонезиядан таклиф бўлди. Бир нигериялик футболчи телефон қилиб хавотир олмаслигимни, ҳаммаси жойида эканини айтди. Бундан ташқари, у ерда Майкл Эссьен ҳам ўйнарди. Бир вақтлар «Реал»да ўйнаган Эссьенлар борган бўлса, мен нимага бормаслигим керак деб Индонезияга йўл олдим. У ерда 7 юлдузли меҳмонхонага жойлашдим, бунақасини кейинчалик ҳеч қаерда кўрмадим. Шароитлар жуда зўр эди.
– Индонезияга футбол ўйинларига бирор киши тушадими?
– 80 минглаб мухлис тушади.
– Ҳазиллашяпсизми?
– Йўқ, масалан Жакартада «Персиджа»нинг ўйинларига 80 минг одам тушади. Стадионга кира олмайдиганлар ҳам жуда кўп бўлади. Стадион ҳам жуда ажойиб.
