Шу йилнинг 17 апрель куни Тошкентдаги “Tashkent City” мажмуасининг қурилиш майдонида Бельгиянинг Radisson Hotel Group компанияси ижрочи вице президенти ва бош ижрочи директори Элин Юнес ҳамда Real House компанияси директори Бегзод Максумов иштирокида учрашув бўлиб ўтди.
Унда томонлар “Tashkent City” мажмуаси таркибида Park Inn by Radisson Tashkent City Hotel & Apartments мажмуасини барпо этиш бўйича ўзаро келишувга эришди, дея хабар бермоқда Kun.uz мухбири.
Келишув шартномасига кўра, 2021 йилда Тошкентда янги меҳмонхона ва апартамент қуриб битказилади. Лойиҳага Тошкентдаги етакчи қурилиш компанияларидан бири, Real House бренди таркибига кирувчи “Lotus Gas Invest” компанияси ҳамкорлик қилади.
Янги лойиҳа жами 300 ўринли (номер) меҳмонхонани (шундан 50 таси апартамент кўринишида, 250 ўрни стандарт ва люкс хоналар), шунингдек, конференц зал, 5 та музокара хонаси, тренажёр, 24 соат ишлайдиган ресторан, барни (Gastro Pub Sky Bar) ўз ичига олади.
Лойиҳа шунингдек, тадбиркорлар учун турли марказлар, болалар боғчаси, поликлиника, турли курслар учун мўлжалланган Coworking марказлари, харидлар ва дам олиш учун турли марказларни қамраб олади.
Бундан ташқари, меҳмонхонанинг энг баланд қисмида шинам (sky) ресторан қурилиши режалаштирилган. Ресторанда бўлиш мижозларга “Tashkent City” мажмуасининг тунги ва кундузги қиёфасини тўлиқ томоша қилиш имкониятини тақдим этади.
“Туризм Ўзбекистонда энг тез ривожланаётган йўналишлардан бири. Жумладан, 2018 йилнинг ўзида юртингизга 5 миллиондан ортиқ сайёҳ ташриф буюрган. Биз Park Inn by Radissonʼни Ўзбекистонга олиб кираётганимиздан мамнунмиз. Ажойиб минтақага янги брендни олиб кириш бизга хурсандчилик бағишлайди”, деди Radisson Hotel Group компаниясининг ижрочи вице президенти ва бош ижрочи директори Элин Юнес.
Real House компанияси маркетинг департаменти бошлиғи Бахтиёр Абдуваҳобовнинг Kun.uzʼга маълум қилишича, икки томонлама шартнома 17 йилга мўлжаллаган. Radisson Hotel Group компанияси бу вақт оралиғида Park Inn by Radisson Tashkent City Hotel & Apartments мажмуасини қуриб, хизмат кўрсатишга кўмаклашади.
