Ўзбекистоннинг Покистондаги элчиси Алишер Тўхтаев Khan International Investment Consortium компанияси бош директори Ҳабиб Хон билан музокара ўтказди.
Учрашувда Ўзбекистонда амалга оширилаётган ислоҳотлар, хорижий сармоядорлар учун яратилган имкониятлар, инвестиция муҳити ва мамлакатнинг сайёҳлик салоҳияти муҳокама қилинди.
Ҳабиб Хоннинг маълум қилишича, консорциум Покистон ва АҚШда меҳмонхоналарни бошқариш ва уларга хизмат кўрсатиш соҳасида фаолият юритиб келмоқда.
Компания Ўзбекистондаги йирик меҳмонхоналар билан ўзаро манфаатли ҳамкорлик ўрнатиш ва АҚШнинг Best Western халқаро меҳмонхона брендини мамлакат бозорига олиб киришни режалаштирган. Қайд этилишича, мазкур бренднинг Ўзбекистон ҳудудида фаолият юритиши учун тегишли розилик ҳам олинган.
Музокараларда Тошкент вилоятида меҳмонхона бизнесини ривожлантириш, кўчмас мулк ва замонавий турар жой мажмуаларини барпо этишга инвестициялар жалб қилиш масалалари ҳам кўриб чиқилди.
Шунингдек, Зомин туманида қўшма инвестиция лойиҳаларини амалга ошириш истиқболлари муҳокама қилинди.
Томонлар истиқболли лойиҳаларни батафсил ўрганиш ва амалий босқичга олиб чиқиш мақсадида Khan International Investment Consortium делегациясининг Ўзбекистонга бизнес-миссиясини ташкил этишга келишиб олди.
Маълумот учун, Khan International Investment Consortium кўчмас мулк, меҳмонхона бизнеси, электр транспорт воситалари ишлаб чиқариш, энергетика ва қурилиш соҳаларида фаолият юритади. Консорциум АҚШ, Буюк Британия, Хитой ва Покистонда турли бизнес лойиҳаларини амалга оширган ҳамда 24 дан ортиқ меҳмонхонани бошқаради.
