Тошкент ҳокимлиги матбуот хизмати пойтахт кўчалари ҳар кучли ёмғирдан кейин сув остида қолаётганининг сабабини айтди. Бу ҳақда Sputnik Узбекистан нашри хабар берди.
Ҳокимлик ходимларининг фикрича, бундай ҳолат аҳоли ариқларга ва ёмғир суви кетадиган жойларга чиқиндиларни ташлаши сабабли юз бермоқда. Бунинг оқибатида ариқлар чиқиндиларга тўлиб, сув оқиб кетмай ташқарига тошмоқда.
“Ҳокимлик хизматлари кўчаларни чиқиндилардан максимал тозалашга ҳаракат қилади, бироқ баъзи ариқлар барибир чиқиндилар ва шиша идишлар билан тўлдирилмоқда”, деб маълум қилинган ҳокимлик матбуот хизматида.
Ҳокимликда таъкидланишича, Тошкентнинг 40 та жойида тошқинлар бартараф этилган. Шаҳар кўчаларида 50 тадан кўпроқ техника ишламоқда. Бундан ташқари, тошқинларни бартараф этиш бўйича ишчи гуруҳнинг махсус штаби ташкил этилган.
Таъкидлаш жоиз, 24 апрелда ҳам Тошкент кўчалари кучли ёмғирдан кейин сув остида қолди.
