Азар «Челси» мухлислари билан хайрлашди. У жамоадан кетишини тасдиқлади

«Челси» яримҳимоячиси Эден Азар АПЛнинг сўнгги тури доирасидаги «Лестер»га қарши ўйиндан сўнг трибуналарга яқин бориб, жамоа мухлислари билан хайрлашди.

У ўйиндан кейин журналистлар саволларига берган жавобида ёзда бошқа клубга кетишини тасдиқлаган.

– «Челси»нинг Чемпионлар лигасига чиққани сизни шу клубда қолишга кўндира оладими?
– Йўқ, бундай деб ўйламайман. Гап шундаки, мен қарор қабул қилиб бўлганман.

– Вазият қандай кечмоқда?
– Мен ҳали кутяпман.

– Ўз қарорингиз ҳақида клубга айтдингизми?
– Ҳа, бир неча ҳафта олдин. Жамоадошларим ҳам хабардор. Мен бир тўхтамга келиб бўлганман, лекин бу фақатгина менга боғлиқ эмас. Ҳали финалда ўйнашимиз керак, шундан сўнг кўрамиз.

– Масала мавсум якунига қадар ҳал бўлишини истармидингиз?
– Ҳа, йўқ демасдим, лекин бундай бўлгани йўқ. Мен ҳам худди сиз ва мухлислар каби кутмоқдаман. Ҳеч қачон, ҳеч қачон диққатим бўлингани йўқ. Майдонда эканимда қўлимдан келганча энг яхши ўйинимни кўрсатишга интиламан. Бу вазият мени чалғитмаяпти. Мен фақат ўйинларда ғалаба қозонишга ҳаракат қиляпман.