Ўзбекистонда ғор туризми ривожлантирилади: 10 та манзил танланди

Сурхондарё вилояти, Бойсун тумани

Туризм қўмитаси спелеотуризмни ривожлантириш мақсадида мазкур рўйхатга ўзгартиришлар киритиши мумкин.

Тасдиқланган «йўл харитаси»га мувофиқ, объектлар хатловдан ўтказилиб, уларнинг географик координаталари, туристик имкониятлари, техник ҳолати ва ҳуқуқий мақоми ҳақидаги маълумотлар йиғилади. Ҳар бир объектнинг электрон паспорти тайёрланиб, 2027 йил мартда ягона электрон реестр шакллантирилиши белгиланган.

Шунингдек, ғорларнинг 3D моделлари ва виртуал кўринишлари ишлаб чиқилади. Туристлар учун QR-код орқали ахборот олиш, электрон гид ва онлайн банд қилиш хизматларини жорий этиш назарда тутилган. Ушбу маълумот ва хизматлар Миллий туризм платформаси билан интеграция қилинади.

2027 йил апрелда спелеотуристик маршрутларни ишлаб чиқиш ва тасдиқлаш, кейинчалик йўналтирувчи белгилар ўрнатиш ҳамда электрон хариталар яратиш режалаштирилган.

Объектлар ҳудудида 2027–2028 йилларда автотураргоҳлар, санитария-гигиена шохобчалари, дам олиш майдонлари ва зарур муҳандислик-коммуникация инфратузилмаси барпо этилади. «Йўл харитаси»да яратилган инфратузилма объектларини 2029 йил январда фойдаланишга топшириш белгиланган.

Маҳаллий аҳолига оилавий меҳмон уйлари ташкил этишда кўмаклашилади. Гидлик ва сервис хизматларини ривожлантириш, соҳа учун мутахассислар тайёрлаш ҳам кўзда тутилган. Жумладан, 2027 йил апрелда гидлар ва йўриқчилар учун ўқув курслари, июнда эса уларнинг малакасини баҳолаш ва сертификатлаш тизимини йўлга қўйиш белгиланган.

Туристлар хавфсизлиги бўйича алоҳида талаблар ишлаб чиқилади. Объектларда огоҳлантирувчи белгилар, эвакуация чизмалари ва ахборот стендлари ўрнатилади, қутқарув хизматлари билан ҳамкорликда амалий машғулотлар ўтказилади.

Қарорда табиий ва маданий меросни муҳофаза қилиш талаблари ҳам белгиланган. Маданий мерос объектларида қурилиш ва ободонлаштириш ишлари Маданий мерос агентлиги билан, муҳофаза этиладиган табиий ҳудудларда эса Экология ва иқлим ўзгариши миллий қўмитаси билан мажбурий келишилиши лозим. Ишлар тегишли рухсатлар олингач, белгиланган чеклов ва тақиқларга риоя қилинган ҳолда бажарилади.

2027 йилдан халқаро илмий экспедициялар ва тадқиқотларни ташкил этиш, соҳага хусусий инвестициялар ҳамда халқаро грантларни жалб қилиш чоралари ҳам назарда тутилган.